Sarah Jessica Parker po përballet me komentet e rrjetit teksa vitet kalojnë. Sidomos tani pas rikthimit në seritë e reja të “Sex And The City”.

Parker tregon se ajo, por edhe miket e saj, bashkëprotagoniste në serial kanë marrë disa komente negative për mënyrën sesi pamja e tyre fizike ka ndryshuar me vitet. Pra njerëzit kanë bërë krahasime mes dy kohëve.

“Ka kaq shumë biseda mizogjene ndaj nesh që nuk bëheshin kurrë ndaj një burri. Flokë gri, flokë gri, flokë gri. A i ka ajo flokët me thinja?”, tregon Sarah Jessica Parker për Vogue.

Në korrik e kaluar aktorja u shfaq me rrënjët e saj natyrale gri në flokë, teksa drekonte me miqtë.

Komenteve në rrjet që pasuan këtë foto, ajo iu përgjigj, duke thënë: “Unë jam ulur këtu me Andy Cohen, dhe ai ka ka gjithashtu flokë të thinjur dhe duket shkëlqyer. Pse për të është ok të ketë flokë të thinjur e për mua jo? Nuk di çfarë t’ju them o njerëz”.

Parker shton se rrjetet sociale e kanë përkeqësuar këtë formë reagimi.

“Pothuajse duket sikur njerëzit nuk duan që ne të jemi krejtësisht në rregull me veten tonë reale. Duket sikur na mëshirojnë për atë që jemi sot. Unë e di se si dukem. Nuk kam zgjidhje. Çfarë doni që të bëj? Të ndaloj plakjen? Të zhdukem?”, tha aktorja.