Deputeti Flamur Noka ka rikonfirmuar edhe njëherë se Kuvendi i vetëm i demokratëve do të mblidhet më 11 dhjetor, duke theksuar se ai i thirrur nga Lulzim Basha dhe i votuar dje nga Kryesia është një antimiting.

I ftuar në RTV Ora, Noka hodhi akuza mbi kreun e Bashkisë së Tiranës Erion Veliaj, se bashkë me delegatët e tij po iu bën presion qytetarëve, për të mbështetur Lulzim Bashën dhe për të mos marrë pjesë në Kuvendin e Berishës më 11 dhjetor.  

Noka deklaroi se ka emra konkretë të delegatëve dhe se Veliaj është një nga përkrahësit më të zjarrtë të Bashës, për të thirrur Kuvendin.

Pjesë nga biseda:

Ora News: A mund të shkojmë në një kalvar përplasjesh të gjatë në gjykata?

Flamur Noka: Më 18 do shikoni ushtarët e George Soros në minorancë qesharake që do i braktisin të gjithë demokratët vetëm po e mbushën me njerëz të PS-së. Vetëm po i ndihmoi Edi Rama. Tani që po flasim kam informacion pafund se në Tiranë Erion Veliaj ka shpërndarë ushtarët e tij duke i bërë presion apo duke i kërkuar të bëjë favore delegatëve në shkëmbim të mospjesëmarrjes më datën 11 dhe pjesëmarrjes më 18 dhjetor. Dihet tashmë Erion Veliaj është një nga luftëtarët më të zjarrtë që peng kryetari ka për mbledhjen e kuvendit të 18 dhjetorit. Gjithashtu shumë titullarë të qeverisë së zotit Rama janë duke luftuar kundër pjesëmarrjes në datën 11 dhe pjesëmarrjen më 18 dhjetor.

Ora News: Po thoni se zoti Veliaj po ndërhyn?

Flamur Noka: Po në fshatrat e Tiranës, i kam me emra. Janë thirrur delegatë nga njerëzit e Erion Veliajt, duke I bërë presion, qoftë duke i thënë që do ju favorizojmë me leje ndërtimi apo vende pune të familjarëve në shkëmbim të mbështetjes së Lulzim Bashës. Kemi dhe emrat dhe do I shpallim kush ka bërë këtë Pazar. Në 11 dhjetor do të shkojmë në Kuvend për të shpalosur një platformë që do të rrëzojë regjimin Rama- Basha.