Sipas “Shoqatës Amerikane për Humbjen e Flokëve”, 2/3 e meshkujve pësojnë humbje të flokëve pas moshës 35 vjeç. Por edhe femrat e vuajnë këtë gjë, duke zënë 40% të personave që vuajnë nga rënia e flokëve. Rënia e flokëve ndikon jo vetëm në imazhin e tyre, por edhe në mirëqenien emocionale. Një studim i vitit 2014, ka sjellë shpresa për formimin e disa qelizave që do të ndihmonin në rigjenerimin e flokëve.

Hulumtuesit nga Universiteti i Mjekësisë në Pensilvani publikuan rezultatet e studimit të tyre ku përshkruan një metodë sipas së cilës konvertuan qelizat e të rriturve në qeliza staminale epiteliale. Megjithëse përdorimi i qelizave staminale për të rigjeneruar gjendrat e flokëve ishte një teknikë e mirë kundër tullackllëkut, deri më tani, askush nuk ka arritur të prodhojë mjaftueshëm qeliza të tilla.

Skuadra tha se janë të parët që kanë arritur rezultate të tilla tek njerëzit apo minjtë. Shkencëtarët e filluan kërkimin e tyre duke përdorur qelizat e lëkurës të quajtura fribroblaste. Ata i kthyen qelizat njerëzore në qeliza staminale pluripotente duke u shtuar tre gjene. Këto qeliza ishin të afta të shndërroheshin në çdo lloj qelize të trupit, kështu që kërkuesit e shndërruan ato në qeliza staminale epiteliale, të cilat janë pjesë e gjendrave të flokut. Këto qeliza ata i “detyruan” të krijonin sasi të mëdha qelizash staminale epiteliale. Kur këto qeliza iu implantuan minjve, ato u rigjeneruan si qeliza të lëkurës njerëzore dhe gjendra të flokëve dhe gjithashtu krijuan qime, të cilat, sipas shkencëtarëve, tek njerëzit do të çonin në rirritjen e flokëve.

Megjithatë, në fund shkencëtarët thanë se është ende herët për të folur për një teknikë të aplikuar tek njerëzit.