Arben Imami: I kërkova Berishës në 2018 të rikthehet, Basha një mediokër

Anëtari i Partisë Demokratike, një nga themeluesit e Partisë Demokratike, Arben Imami i ka konsideruar pozitive ngjarjet e fundit brenda PD.

I ftuar në Euronews Albania, Imami tha se pas Kuvendit Kombëtar, Lulzim Basha nuk është më kryetar i PD as ‘de fakto’ dhe as ‘de juro’.

Imami shtoi se se i ka kërkuar ish kryeministrit Berisha që të rikthej në krye të PD që në 2018-ën.

“Në 2018 i kam kërkuar Berishës që ta marrë përsipër PD pasi kam pasur bindjen se roli i Berishës në PD është i pamatshëm me dikë tjetër. Njeri që mund të ndikojë fort në rrugën e saj qoftë për mirë dhe qoftë për keq është Sali Berisha”, tha Imami.

Ish-ministri i Mbrojtjes thotë se pak persona e mendonin se kjo lëvizje mund të arrinte deri këtu ndërsa e cilëson si “impresiv” Kuvendin Kombëtar të PD për nga mbështetja dhe organizimi.

Imami thotë se Kuvendi ka realizuar pritshmërinë e demokratëve. Ai shtoi se Berisha ka mbështetje duke qenë lider historik i PD por edhe për faktin se Basha ka dështuar si kryetar partie.

Pavarësisht pretendimeve  të Bashës se deri tani nuk e ka drejtuar partinë në mënyrë të pavarur, Imami tha se “ka marrë të gjitha vendimet që ka dashur”.

“Ka qenë në hije se është mediokër, për mediokritet e Bashës mban përgjegjësi Berisha pse e vuri kryetar por jo pse është mediokër në politikë. Dështoi tërësisht në gjithçka”, tha Imami.

Ai shtoi se Berisha ka rikthyer shpresën dhe jo vetëm në radhët e demokratëve por edhe më gjerë pasi shumë janë të ngopur nga punët e këqija të Edi Ramës.