Presidenti i Turqisë Rexhep Tayyip Erdogan mbajti një fjalim në Parlamentin e Shqipërisë.

Ai e vuri theksin te miqësia e ngushtë mes dy vendeve dhe se Turqia e sheh vendin tonë si një partner strategjik. 

“Me Shqipërinë kemi lidhje të forta historike dhe humane. Për ne, Shqipëria është fqinji ynë në zemër. Marrëdhëniet tona përfshijnë gati 6 shekuj. Gjurmët tona të përbashkëta nuk janë vetëm politike. Marrëveshjet e bashkëpunimit tona që rrënjat i kanë të thella, janë shumë të forta dhe të palëkundura. Deklarimi i njëanshëm i kryeministrit se Turqia është një nga 5 partnerët strategjikë të Shqipërisë, është plotësimi i kësaj tabloje që shikojmë sot. Ne i kemi ngritur zyrtarisht marrëdhëniet tona në nivelin e partneritetit strategjik.

Në do vazhdojmë të kontribuojmë në stablitetin e vendeve tona dhe mbarë rajonit. Kur Shqipëria dhe Turqia të bashkojnë duart me lejen e të madhit Zot nuk do të ketë asnjë problem që të mos ta kalojmë apo të mos ta zgjidhem.

Së bashku nuk do lejojmë askënd të prishë këtë panoramë të bukur. Në ndjekim me vlerësim rolin konstruktiv që ka luajtur Shqipëria në Ballkan dhe për njohjen e Kosovës si shtet i pavarur. Dua të uroj Shqipërinë për anëtarësimin e përkohshëm në Këshillin e Sigurimit të OKB-së. Ne do të ndajmë përvojat tona për këtë detyrë që e kemi kryer në të kaluarën.

Populli turk qëndron pranë popullit shqiptar sic ka qenë gjithmonë. Turqia ishte vendi i parë që dha ndihmë gjatë tërmetit dhe pandemisë që shpërtheu në vitin 2020. Në kuadër të marrëveshjes që kemi shumë shpejt vaksinën turcovac jemi të gatshëm ta vëmë në dispozicion të Shqipërisë”, tha Erdogan.

Presidenti turk kërkoi nga autoritetet shqiptare që të marrin masa ndaj organizatës terroriste FETO. Sipas tij kjo çështje duhet të mbarojë deri në vizitën e tij të ardhshme në Shqipëri.

“Fakti që FETO ende gjen vend në vendin tonë mik, e dëmton shumë vendin tonë, në periudhën përpara të merren hapa më të shpejta kundër Fetos në Shqipëri.

Anëtarët e kësaj organizate pas 5 vitesh nga grushti i shtetit vijojnë të jenë në Shqipëri, në fushën e biznesit, në fushën e arsimit dhe në fusha të tjera. Çështjen e FETO-s ne e shohim si një parakusht të vëllazërisë tonë. Ndaj nuk duhet të keni asnjë lloj dyshimi se ata me të ardhur koha do të tregojnë fytyrën e tyre të vërtetë. Sa më shpejt duhet të shpëtoni nga kjo strukturë helmuese dhe tinëzare.

Nëse nuk veproni në kohë, tentativa si në Turqi mund të përsëriten dhe në vendin tuaj. Ne si shtet kemi paguar një kosto shumë të rëndë. Presim që Shqipëria të marrë masa të menjëhershme kundër FETO-s dhe shpresoj që kjo çështje të ketë marrë fund në vizitëm time të ardhshme në Shqipëri”, u shpreh Erdogan.