Këngëtarja Myfarete Laze ishte e ftuara speciale në programin “Dola te Ola” këtë të diel, ku përveç rrëfimit të rrallë mbrëmja u shoqërua edhe me muzikë të mirë të kënduar nga ajo dhe vëllezërit korçarë.

Gjatë programit teksa u shfaq një fotografi me bashkëshortin, Myfaretja tha se ai është dashuria e jetës së saj dhe zbuloi se kanë plot 42 vjet bashkë. Ata janë prindër të dy vajzave të mrekullueshme, dhe janë bekuar edhe me një mbesë.

Këngëtarja zbuloi se ka patur shumë dëshirë që vajzat e saj të këndonin ose të mësonin ndonjë instrument, por ato vetë nuk e kanë dëshiruar diçka të tillë ndaj nuk ka ndodhur.

Ndërkohë për mbesën tregoi se ka filluar të mësojë pianon dhe zbuloi se ka vesh shumë të mirë për muzikë. Një moment shumë i bukur në program ishte kur Myfaretja u surprizua nga mbesa e saj me një videomesazh shumë të ëmbël.

Surprizat për këngëtaren ishin të shumta, pasi teksa ajo nisi të flasë për rëndësinë që ka miqësia në jetën e saj, dy nga miket e saj të zemrës kishin dërguar videomesazhe për të. Bëhet fjalë për Liljana Cingun dhe Alida Hiskun, të cilat e emocionuan këngëtaren me fjalët që kishin zgjedhur për t’i thënë mikes së tyre.

Në fund të programit Myfarete Laze u shpreh e lumtur që ka arritur të vendosë një gur themeli në artin shqiptar, teksa shtoi se pavarësisht vështirësive që ka hasur ndër vite, është munduar të qëndrojë brenda mënyrës së saj të të bërit muzikë dhe herë pas here merr pjesë në aktivitete të ndryshme për të mos i munguar skenës.

Mbrëmja në “Dola te Ola” u mbyll me interpretimin e këngës “Triumfi i jetës” nga Myfarete Laze dhe vëllezërit korçarë, të cilët pas Festivalit ishte hera e parë që e kënduan jashtë asaj skene, duke dhuruar sërish emocione rrëqethëse dhe të pakrahasueshme