Partia Demokratike ka reaguar pas shpalljes së rezultatit të primareve, të mbajtura në gjashtë bashki, fituesit e së cilave do të pëfaqësojnë grupin Berisha në zgjedhjet e pjesshme lokale. 

Kandidatët pritet të luftojnë për të fituar bashkitë, veçanërisht atë të Shkodrës, të cilën grupi i Berishës ka shpresë se mund ta fitojë. 

Nga ana tjetër, Lulzim Basha ka reaguar, nëpërmjet llogarisë së partisë në rrjetet sociale. Në reagim thuhet, se Berisha “vetë voton dhe vetë numëron”, por nuk shpjegohet përse Basha nuk i nënshtron kandidatët në proces primaresh, edhe pse këtë ide e ka artikuluar shumë herë, por nuk e ka aplikuar, duke i caktuar gjithmonë vetë kandidatët për kryetar bashkie dhe për deputetë. 

“Një proces ku Berisha emëron, Berisha voton, Berisha numëron, është vetëm vijimi i tollovisë së krijuar nga personi i shpallur non grata për korrupsion. As Berishën, as kandidatët e tij nuk i lidh asgjë me Partinë Demokratike.
Rama dhe Berisha po krijojnë një parti të re për të dëmtuar Partinë Demokratike dhe për ta mbajtur Shqipërinë në vendnumëro.
Zgjedh Ramën, mban Berishën.
Zgjedh Berishën, mban Ramën”, thuhet në njoftimin e PD.