Një ditë më parë Komisioni i Rithemelimit të PD-së zyrtarizoi kandidatët që do të garojnë në zgjedhjet e pjesshme vendore të 6 marsit.

Disa ditë më parë ishte Partia Socialiste që vendosi se me kë do të garonte në Durrës, Rrogozhinë, Dibër, Shkodër dhe Vorë.

Ndërsa për Bashkinë Lushnjë nuk kanë përfunduar ende diskutimet dhe pritet që PS ta zyrtarizojë nesër emrin. Ndërkohë Lulzim Basha ende nuk ka bërë me dije zyrtarisht asnjë emër, por ka thënë se konsultimet vazhdojnë.

Në bastionin e demokratëve, Shkodër, Sali Berisha do të garojë me Bardh Spahinë, ndërsa Edi Rama me Majlinda Agoni. Spahia ka mbajtur postin e zv.ministrit të Shëndetësisë, ndërsa Agoni është aktualisht prefekte e qarkut Shkodër.

Mbëtet për t’u parë nëse demokratët do të arrijnë ta mbajnë Shkodrën, apo përçarja e tyre do të favorizojë socialistët në këtë garë.

Në bashkinë tjetër të madhe, Durrësin, Berisha do të garojë me Ardian Mukën, ndërsa Rama zgjodhi t’i jepte një tjetër shans Emirjana Sakos. Muka është një urbanist dhe pjesë e demokratëve që prej vitit 2007. Ndërsa Sako është aktualisht kryetare e komanduar në Bashkinë Durrës.

PS-ja ende nuk ka një emër për Lushnjën, ndërsa Komisioni i Rithemelimit synon fitoren me juristin Elton Banon, i cili është djali i ish-deputetit të PD-së Ilir Bano.

Ndërkohë në Rrogozhinë, Rama do të garojë me Edison Memollën, ndërsa Berisha me Hekuran Xhanin. Memolla është aktualisht kryetar i komanduar, ndërsa Xhani është me profesion mjek veteriner.

PS kërkon fitorën e Dibrës me Rrahim Spahiu, një emër jo aktiv në politikë me eksperiencë në administratën publike dhe sistemin banker. Ndërsa Berisha do të garojë me arsimtarin Premtim Kryemadhin.

Rama ka zgjedhur një arsimtar për Vorën, Blerim Sherën, ndërsa Berisha do të kandidojë me ekonomistin Lulzim Vrana.