Radar
Richard Grenell: Përgëzoj Edi Ramën që mbështet komunitetin LGBT!
Foto ilustrim: Edi Rama dhe Richard Grenell
Diplomati amerikan Richard Grenell, ish i dërguari special i Presidentit Trump për Ballkanin, ka dhënë një intervistë për emisionin “Opinion”.
Grenell, u pyet nga Blendi Fevziu lidhur me komunitetin LGBT në Shqipëri.
Grenell tha se kjo është një kauzë e rëndësishme për të dhe përgëzoi kryeministrin Rama, “që ka qenë mbështetës për këtë çështje”, por pa e shpjeguar konkretisht se si e ka mbështetur Edi Rama komunitetin LGBT, përfaqësues të së cilës janë ankuar shpesh për faktin që kryeministri nuk ka një qëndrim publik për çështjet sensitive, si martesat gay apo adoptimi i fëmijëve nga persona të së njëjtës gjini.
Pjesë nga intervista:
FEVZIU: Zoti Grenell, ju keni qenë mbështetës i të drejtave të LGBT-së. A keni ndonjë ide në lidhje me të drejtat e komunitetit të LGBT-së në Shqipëri?
GRENELL:Do t’i këshilloja qeverisë që të kuptojnë se të jesh gej apo lesbike nuk duhet të jetë problem. Është një çështje e dashur për mua, sepse ka të bëjë me të drejtat e njeriut.
FEVZIU: Ambasada Amerikane ka ndërmarrë disa nisma për këtë çështje.
GRENELL: Këtë nuk duhet ta bëjë vetëm ambasada, por duhet ta bëjnë shqiptarët dhe të kuptojnë se personat gej apo lesbiket janë njerëz si gjithë të tjerët. Kanë të drejtë të jetojnë të lirë dhe nuk duhet të jetë më një tabu. Është e rëndësishme dhe sa herë që vij këtu e kam ndër mend këtë çështje dhe dua që të përparoj me të. Duhet të përgëzoj zotin Rama, i cili është treguar mbështetës për këtë çështje.