Lulzim Basha

Lulzim Basha nuk ka farë ndërmend të japë dorëheqjen. Ky është konkluzioni i mbledhjes prej pesë orësh të grupit parlamentar të Partisë Demokratike. 

Mbledhja ka qenë mjaft e tensionuar dhe me debate. Shumica e deputetëve kanë kërkuar largimin e Bashës, përfshirë edhe njerëzit e tij më të afërt. 

Por, Basha nuk e ka artikuluar ne asnjë moment dorëheqjen. Përkundrazi ai ka dhënë të gjitha shenjat se as e ka ndërmend ta marrë një hapë të tillë. Ai ka thënë se do të bëjë një analizë të thellë dhe se do të vijojë konsultimet me të gjithë forumet e partisë. 

Kryefjalë e qëndrimit të Bashës ka qenë shprehja “duhet gjetur një zgjidhje për të mirën e PD”. Por, me sa duket në mendjen e tij, largimi nga kryetar, nuk është në të mirën e kësaj partie, ndaj po vijon rezistencën edhe pse nuk ka më thuajse asnjë mbështetës. 

Partia Demokratike ndodhet në një krizë të thellë dhe në zgjedhjet e pjesshme lokale përfundoi me 13% të votave, duke u renditur forcë e fundit. Ajo e ka humbur kredibilitetin tek një pjesë e madhe e qytetarëve, që nuk pranon prezencën e opozitës as në protestat kundër rritjes së çmimeve, me argumentin se prezenca e tyre e prish protestën. 

Mbetet për t’u parë çfarë hapash do të ndërmarrin në vijim deputetët, por edhe Sali Berisha me grupin e tij.