nga AgroWeb

A duhet ti përzieni së bashku uthullën balsamike dhe vajin e ullirit? Foto: Flickr

Uthulla balsamike dhe vaji i ullirit janë të pasur me antioksidantë që pakësojnë gjasat e shfaqjes së sëmundjeve kardiovaskulare.

Vaji i ullirit është një burim i mirë i vitaminës K dhe E apo të yndyrnave të pangopura që janë të shëndetshme.

Ekspertët e AgroWeb.org thonë se uthulla balsamike ka pak kalori dhe ndihmon në uljen e sheqerit në gjak.

Por a duhet ti përzieni së bashku? AgroWeb ju tregon një listë me vlera dhe servirjen e duhr të tyre.

Të dhënat bazë

Uthulla balsamike e pastër përgatitet nga varietetet e rrushit dhe maturohet për të paktën 12 vjet në fuçi druri.

Pas kësaj periudhe, uthulla balsamike është e errët, e trashë, me një nuancë ëmbëlsie, por e kripur në çmim.

Uthullat balsamike që përgatiten për treg masiv janë të fermentuara për një kohë të shkurtër dhe zakonisht përmbajnë përbërës shtesë që nuk ofrojnë të njëjtën shije komplekse dhe të pasur.

Ndërsa prodhimi i vajit të ullirit, sidomos i atij të virgjër kërkon presim të ftohtë dhe ullinj të një cilësie të lartë.

Kombinimi i uthullës balsamike me vajin e ullirit sipas studimeve më të fundit arrin të fuqizojë si askush tjetër vlerat e përbashkëta shëndetësore të këtyre produkteve bazë për një shëndet të shkëlqyer dhe organizëm në formë. AgroWeb.org ju fton të lexoni faktet e mëposhtme.

Vitamina E

Një lugë gjelle me vaj ulliri ofron 1.9 miligramë ose 13 përqind të dozës së rekomanduar ditore të vitaminës E, e cila shërben si një antioksidant që neutralizon radikalet e lira përpara se ato të dëmtojnë qelizat yndyrore.

Ky funksion është mjaft i rëndësishëm sepse acidet yndyrore mbështesin sistemin imunitar dhe e transportojnë kolesterolin në gjak në mënyrë të sigurt.

Yndyrnat krijojnë një sistem mbrojtës për lëkurën që shënjestrohet gjithnjë nga radikalet e lira të formuara nga ekspozimi në rrezet ultravjollcë.

Mbajtja nën kontroll e peshës

1 lugë gjelle më uthull balsamike përmban vetëm 14 kalori. Ajo mund të ulë sheqerin në gjak pas ngrënies dhe ndihmon në parandalimin e diabetit të tipit 2.

Për më tepër, sipas Shoqatës Amerikane të Diabetit, ajo ndalon shtimin në peshë që ndodh kur sheqernat shtesë akumulohen si yndyrë.

Yndyrnat e shëndetshme

Një lugë gjelle me vaj ulliri përmban 119 kalori dhe 13.5 gramë yndyrë. 73% e kësaj yndyre është mono-e-pangopur dhe 10 përqind është polio-e-pangopur.

Të dyja llojet e yndyrnave ulin nivelin e kolesterolit dhe ndihmojnë në pakësimin e inflamacionit.

Polifenolët

Uthulla balsamike dhe vaji i ullirit përmbajnë të dyja antioksidantë nga burime bimore që quhen ndryshe polifenolë.

Këto të fundit te vaji i ullirit ndihmojnë në parandalimin e inflamacionit, ulin tensionin e gjakut dhe parandalojnë mpiksjen që bllokon enët e tij.

Të dhënat e publikuara në “Journal of Nutritional Science and Vitaminology” tregojnë gjithashtu se polifenolët në uthullën balsamike luajnë rol duke neutralizuar radikalet e lira përpara se ato të dëmtojnë yndyrnat që transportojnë kolesterolin.

Rekomandime për servirjen

Kombinimi i vajit të ullirit me uthullën balsamike është ideal për sallatat, bizelet, shpargun, brokolin dhe panxharin. Kavërdisni kërpudhat, qepët dhe brokolin me vaj dhe uthull.

Eksperimentoni me sasi të ndryshme të dy produkteve.

Në marinimin e pulës së pjekur mund të përdorni më shumë vaj dhe më pak uthull balsamike.

Në rast se dëshironi të gatuani karrota, zieni një sasi më të madhe të uthullës balsamike deri sa të pakësohet ndjeshëm dhe më pas shtoni vajin e ullirit dhe karrotat./AgroWeb.org