Ministrja e Infrastrukturës dhe Energjetikës, Belinda Balluku, ka shtruar propozimin që të shtohet përdorimi i mjeteve elektrike e duke lënë mënjanë makinat me karburant.

Gjatë prezantimit të flotës së gjelbër të Transportit Urban, ministrja u shpreh se detyra e qeverisë është t’i motivojë qytetarët që t’iu drejtohen mjeteve elektrike dhe jo atyre me lëndë djegëse. Balluku shtoi se për herë të parë, do të rimbursohet çdo tarifë regjistrimi për mjetet elektrike dhe do të zerohen tarifat e kontrollit fizik.

“Pandemia na tregoi se si është të jetojmë pa makina. Filluam të shijonim ajrin dhe mënyrën si jetuam ato muaj duke ecur më këmbë dhe biçikleta. Unë mendoj se shumë qytetarë e kane kuptuar që transporti publik është i rëndësishëm sepse kushton më pak, ndihmon përmirësimin e ajrit. Detyra e qeverisë është të motivojë qytetarët ndaj blerjes së automjeteve elektrike. Rimbursojmë çdo tarifë regjistrimi për herë të parë për mjetet elektrike duke zeruar tarifat e kontrollit fizik, leje qarkullimi kombëtare, certifikatë pronësie dhe targat. Një total një tarifë prej 7 mijë 500 lekë të gjelbër mbulohet nga DPSHTR. Ulja TVSH nga 20% në 6%”, u shpreh Balluku.