Ish-kryeministri Sali Berisha foli për zgjedhjen e Presidentit të ri dhe tha se socialistët dëshirojnë Vali Bizhgën në këtë post.

“A e dini se kush ka dalë nga zarfat emri më i përfolur? Sipas statistikave të Ramës, 2/3 e sekreteve i kanë shkuar Vali Bizhgës. Çfarë mund të presësh tjetër. Ndërkohë që emri i saj nuk figuron në asnjë zarf. Prisni e-mailet e shoqërisë civile. U ndala për të theksuar se sa qesharak dhe jo transparent e bëri Rama një proces kushtetues”, tha Berisha. 

Kush është Vali Bizhga

Kryeministri Edi Rama bëri me dije më 19 gusht të vitit 2013 se Bizhga do të ishte drejtoresha e kabinetit të kryeministrit. Asokohe ai bëri me dije se kishte punuar me Bizhgën kur drejtonte Bashkinë e Tiranës.

Kryeministri ka thënë se Bizhga ka luajtur rolin kyç në fushatën që solli në pushtet Ramën në 2013-ën. Nga nënkryetare e Bashkisë Tiranë te një pozicion shumë i rëndëishëm në kryeministri, Bizhga ka zgjedhur të qëndrojë larg vëmendjes së mediave.

“Është kënaqësi dhe nder t’ju prezantoj Drejtoren e Kabinetit tim në kryeministri, Vali Bizhgën. Me Valin kemi punuar krah për krah për shumë vite në Bashkinë e Tiranës, ku kam pasur privilegjin ta kem zëvendësen time dhe më pas Drejtore të Kabinetit të Kryetarit të Bashkisë. Por kemi ndarë së bashku edhe përpjekjet dhe emocionet e disa fushatave, ku Vali ka luajtur prapa kuintave rolin kyç të Drejtorit Ekzekutiv të fushatës”, shkruante Rama në rrjetet sociale në 2013-ën.