“Johny Depp ishte xheloz dhe kontrollues”, ish-e dashura Ellen Barkin zbulon episodet e panjohura

Johnny Depp ishte kontrollues dhe xheloz dhe një herë hodhi një shishe verë në një dhomë, tha një nga ish-të dashurat e tij, aktorja Ellen Barkin. Në dëshminë e saj aktorja tha se Depp ishte shpesh i dehur, gjatë lidhjes së tyre në vitet 1990. Dëshmia në video ishte regjistruar në vitin 2019, dhe u publikua në gjykatë, ku Depp po padit ish-bashkëshorten e tij për shpifje.

Heard e ka akuzuar yllin e Hollivudit për dhunë, të cilën ai e ka mohuar. Trupa gjyqësore ndoqi dëshminë e regjistruar nga zonja Barkin, e cila tha se marrëdhënia e saj me aktorin e “Piratit të Karaibeve” zgjati 3-6 muaj.  

Aktorja tha: “Ai është thjesht një njeri xheloz, kontrollues”, duke shtuar se ai bënte shpesh pyetje të tilla si: “Ku po shkon? Me kë po shkon? Çfarë bëre mbrëmë?”.

“Një herë pata një gërvishtje në shpinë që e zemëroi shumë, sepse ai këmbënguli se unë kisha patur marrëdhënie seksuale me një person tjetër”. Ajo shtoi se e gjente gjithmonë aktorin e famshëm duke konsumuar alkool ose cigare.

Barkin tha se incidenti me shishen ndodhi ndërsa ajo dhe Depp po xhironin në Las Vegas filmin e vitit 1998 “Fear and Loathing”, përshtatur nga libri i Hunter S Thompson.“Depp hodhi një shishe vere në dhomën e hotelit në Las Vegas. Nuk e di pse e bëri!”, tha ajo. Barkin flet për sjellje jo profesionale të aktorit, i cili sipas saj shfaqej me vonesë në xhirime për shkak të konsumit të drogës dhe alkoolit.