Ervin Salianji: OFL vendosi gjoba për grupet kriminale që t’i përdorë për fushatë

Deputeti demokrat Ervin Salianji thirri në Kuvend një interpelancë me ministrin e Brendshëm, Bledi Çuçi, në lidhje me nismat e qeverisë për të goditur krimin duke përmendur këtu Operacionin Forca e Ligjit.

Sipas Salianjit, ato nuk kanë dhënë rezultat në luftën kundër krimit dhe janë përdorur me qëllim për të vendosur gjoba kundër grupeve kriminale dhe për t’i përdorur ato në fushatën elektorale të Partisë Socialiste para zgjedhjeve 25 prillit.

Salianji u shpreh se procesi i Operacionit Forca e Ligjit shërbeu për të luftuar vetëm në letra pasuritë e grupeve kriminale, ndërkohë që pas zgjedhjeve, kjo strukturë ra në heshtje.

“Propagandimi mediatik dhe daljet e shpeshta para zgjedhjeve të 25 prillit pasuan me një vakum pas zgjedhjeve. Kryeministri e cilësonte procesin e pastrimit të Policisë së Shtetit një domosdoshmëri.

Kryeministri Edi Rama më pas, teksa fliste para Policisë së Shtetit, u shpreh se përfaqësues të FBI do vijnë në vendin tonë për të ndihmuar luftën kundër krimit. Nëse ndjekim logjikën e Ramës, ka dështuar procesi i vetingut në polici dhe prandaj ka marrë dhenë krimi në të gjithë vendin.

Ndërkohë për OFL, Edi Rama trumbetonte se duhet t’ia bëjmë të parehatshëm qëndrimin atyre që shkelin ligjin. Sipas tij, në kohë ekstreme kërkoheshin masa ekstreme. Po a ka qenë kjo nismë për të pastruar me letra pasuritë e grupeve kriminale?”, tha Salianji.

Ai deklaroi se Shqipëria renditet në listën gri të pastrimit të parave ndërsa shtroi pyetjen nëse ka pasur si subjekt OFL ish deputetë apo ish ministra që janë favorizuar duke u selektuar gjatë procesit të hetimit. Salianji kërkoi informacion se sa subjekte të OFL janë referuar në SPAK dhe sa prej tyre nuk janë referuar.

“Pse Shqipëria renditet në listën gri të pastrimit të parave? Cilat para pastrohen nëse nuk janë paratë e grupeve kriminale. Kam kërkuar me shkresë në ministri për të ditur sa janë numri i subjekteve të OFL që janë referuar në SPAK dhe atyre që ende nuk janë referuar. Që të dimë nëse ka selektime dhe nëse kemi dy standard në zbatimin e këtij akti normative. Sa është numri total për pjesën tjetër të nismave të qeverisë?

Sa prej tyre e kanë kaluar vetingun? Sa punonjës të Policisë së Shtetit pritet të kalojnë vettingun? Këto janë pyetje që janë ngritur për ministrin”.

“A janë arritur të përmbushen qëllimet që ka pasur ky ligj? Një kriminel i kapur nga SPAK tregon se persona që veprojnë me pagesë kanë marrë para publike dhe tendera me miliona euro. Kjo tregon si ka degraduar vullneti për të luftuar krimin dhe korrupsionin. A e kanë depozituar subjekteve e këtij ligji deklarimin e tyre pranë OFL si duhej depozituar brenda 48 orësh? A ka deputetë dhe ish-deputetë apo ish-ministra që janë subjekt klasik i këtij ligj dhe ju i keni favorizuar për të mos i çuar në SPAK?”, deklaroi ai.

Kurse ministri i Brendshëm, Bledi Çuçi, i bëri thirrje opozitës që të lërë pas politikat e ndasive dhe sherrit dhe të bashkohen në luftën kundër krimit dhe korrupsionit.

Duke iu përgjigjur interpelancës së thirrur nga deputeti Ervin Salianji, ministri Çuçi u shpreh se ligji i OFL dhe ai i vetingut në Policinë e Shtetit janë dy nisma atipike dhe unikale, ndërsa shtoi se do të vazhdojë lufta për të larguar nga Policia e Shtetit ata që nuk e meritojnë uniformën.

Sipas ministrit, akuzat e Salianjit janë të pabaza sepse ligji për OFL-në është miratuar dy vite përpara zgjedhjeve të 2021-it.

“Pretendimi juaj se OFL u përdor për qëllime elektorale është i pambështetur. Është përgatitur në vitin 2019, dy vjet përpara zgjedhjeve. Është miratuar në vitin 2020 dhe ka pasur efekt vetëm një vit. Akti normativ ka parashikuar kohën kur do veprohej. Nuk mund të mendosh se ishte një instrument për qëllime elektorale”, tha Çuçi.