Është e vështirë të gjesh fjalët të përshkruash ndjesinë kur shikon, për herë të parë, Katedralen e Milanos.

Materiali karakteristik i mermerit të bardhë dhe arkitektura gotike do t’ju bëjnë përshtypje, ashtu si përmasat e ndërtesës.

Ka vetëm pak kisha në botë më të mëdha se Duomo e Milanos… dhe ka shumë për të parë…

Pak fjalë mbi historinë e Duomo-s

Pikë referimi në Milano për më shumë se 600 vjet, Duomo e Milanos ka parë ndryshime të panumërta fetare dhe politike, edhe pse me faza të ndryshme përmirësimi dhe ristrukturimi.

Ndërtimi nisi në vitin 1386, duke përdorur mermerin e sjellë nga Liqeni Maggiore përgjatë kanaleve të ndërtuara posaçërisht. Ndërtesa u shenjtërua në vitin 1418.

Arkitektë, skulptorë dhe artistë erdhën nga gjithë Europa për të punuar mbi këtë projekt ambicioz. Ndikimi i tyre është i dukshëm në detajet arkitekturore unike, edhe pse mbizotëron stili gotik.

Seksioni i fundit u purua vetëm në janar 1965, gjë që do të thotë se janë dashur rreth 579 vjet që të përfundojë ndërtimi i katedrales.

Thënë kjo, disa skulptura të parashikuara nuk u përfunduan kurrë dhe katedralja i nënshtrohet thuajse gjithnjë ndonjë tipi ristrukturimi apo restaurimi, ndaj statusi i saj “i përfunduar” është objekt diskutimi.

Çfarë të shihni në Duomo-n e Milanos?

Të vizitosh Duomo-n nuk është aq e thjeshtë sa të blesh një biletë për të hyrë në katedrale, pasi ka shumë gjëra për të parë brenda dhe përreth kompleksit.

Në fakt, të vizitosh çatitë e katedrales për të shijuar pamjen e mrekullueshme të Milanos është po aq popullore sa edhe hyrja në vetë kishën.

Në përgjithësi, ka gjashtë atraksione kryesore: vetë Duomo, çatitë e katedrales, zona arkeologjike, Kripta San Carlo, Muzeu Duomo dhe Kisha San Gottardo.

Brenda Duomo

Bileta për të vizituar Duomo-n brenda është opsioni më ekonomik, vetëm 6 euro dhe ju lejon të vizitoni Duomo-n, duke përfshirë pjesën arkeologjike dhe Kriptën San Carlo.

Pikat kryesore përfshijnë altarët e bukur të Pellegrino Pellegrini, shumë sarkofagë të kryepeshkopëve historikë dhe skulpturën e frikshme të Marco d’Agrate, “San Bartolomeo scorticato” (1562), që tregon shenjtorin duke mbajtur lëkurën e tij të hedhur mbi supe.

Pjesa më e madhe e katedrales është e mbyllur duke i detyruar vizitorët të marrin një rrugë disi konfuze rreth pjesës së brendshme.

Vizitojeni Duomo-n brenda për të paktën 30 – 45 minuta dhe kushtojini edhe 15 – 30 minuta zonës arkeologjike, e cila është nën katedrale.

Çatitë Duomo

Pa dyshim, një pikë e rëndësishme e çdo vizite në Milano është pamja nga lart e katedrales. Jo vetëm që peizazhi është spektakolar, por udhëtimi drejt majës ju jep edhe një vështrim më të afërt të disa detajeve më arkitekturore që ndryshe do të fshiheshin nga shikimi.

Për të arritur në pikën më të lartë, mund të ngjisni 250 shkallë, të merrni ashensorin dhe pastaj të ngjisni disa shkallë, ose të hipni në ashensorin e shpejtë që ju çon gjer lart në majë.

Për të gjithë tre opsionet, është e nevojshme një biletë, me një diferencë në çmim.

Muzeu Duomo dhe Kisha San Gottardo

Ekspozitat e muzeut aty pranë hedhin dritë mbi historinë e katedrales. Aty janë të ekspozuara disa nga thesaret e hequra nga pjesa e jashtme gjatë punimeve të restaurimit.

E rihapur së fundmi pas restaurimit, Kisha San Gottardo dallohet lehtë nga sheshi i Duomo-s falë kullës së saj të lartë.

Nëse e vizitoni katedralen të mërkurën, muzeu dhe kisha janë të mbyllura, ndaj mbajeni mend këtë gjë kur të planifikoni udhëtimin tuaj.

/ Forbes