Dizajneri italian Sabato De Sarno është emëruar drejtori i ri kreativ i Gucci.

Ai do të zbulojë koleksionin e tij të parë gjatë Javës së Modës në Milano shtatorin e ardhshëm.

Lajmi u bë i ditur nga agjencia “Associated Press”, duke cituar njoftimin e Gucci-t dhe kompanisë mëmë Kering.

De Sarno ka punuar më parë për Prada, Dolce & Gabbana dhe Valentino, ku së fundmi ishte drejtor i modës duke mbikëqyrur koleksionet e burrave dhe grave.

“Jam i kënaqur që Sabato do t’i bashkohet Gucci-t si drejtori i ri kreativ i shtëpisë, një nga rolet më me ndikim në përvojën e luksit”, tha CEO i Gucci, Marco Bizzarri, duke vënë në dukje përvojën e tij “me një numër të shtëpive më të njohura të modës luksoze në Itali”.

Spekulimet kanë qenë të përhapura në botën e modës se kush do të pasonte Alessandro Michele pasi ai u largua nga roli papritur vjeshtën e kaluar, pas gati tetë vitesh në të cilat ai ripërcaktoi kodet e markës me pamje gjinore, romantike dhe eklektike.

Ashtu si Michele kur u promovua nga ekipi i brendshëm në vitin 2015, De Sarno është një person relativisht i panjohur në botën e gjerë të modës, pasi ka punuar kryesisht në prapaskenë.

De Sarno, me origjinë nga Napoli, do t’i bashkohet Gucci-t sapo të përfundojë detyrimet aktuale dhe do të jetë përgjegjës për të gjitha koleksionet e markës: për femra, meshkuj, artikuj lëkure, aksesorë dhe stilin e jetesës.

Ndërkohë, koleksionet e Gucci, duke përfshirë koleksionin e veshjeve të grave Vjeshtë-Dimër 2023-2024, që do të shfaqen muajin e ardhshëm në Milano, janë duke u dizajnuar nga ekipi i brendshëm.

De Sarno tha se ishte “i prekur dhe i emocionuar për të kontribuar në vizionin tim krijues për markën”, për të cilin ai tha se “ka qenë në gjendje të mirëpresë dhe vlerësojë vlerat në të cilat besoj”.