Arben RrozhaniFotomontazh: Rama dhe punonjës aziatikë në Shqipëri

Kryeministri i Shqipërisë u shfaq sot i shqetësuar për mungesën e krahut të punës. Sipas Ramës është e papranueshme që punëtorët vendas paguhen pak, ndërsa të huajve ju jepet shumë më shumë për të njëjtën punë. Sot u dëgjuan porosi të tilla si:

“Sipërmarrësi shqiptar duhet ta kuptojë që nuk mund t’i japi gruas që pastron atje në Himarë e në Dhërmi 300 mijë lekë sepse është nga vendi edhe pastaj marrin nga Bali edhe nga Filipinet dhe ju japin nga 1000 Euro. Nuk mund të funksionojë kështu. Duhet që punonjësin shqiptar ta vlerësojmë si sytë e ballit”.

Po si arritëm deri këtu, kur bizneset nuk po gjejnë krahë të aftë për punë, sepse shqiptarët, të detyruar nga kostoja e lartë e jetesës dhe pagat e ulëta, kanë zgjedhur që të emigrojnë.

Një shpjegim duhet kërkuar te kryeministri i vendit që akuzohet për shpopullim dhe braktisje të vendit nga të rinjtë, të aftët dhe njerëzit e ditur.

Mjafton të kthehemi vetëm 2 vite pas. Më 31 mars 2021, gjatë qëndrimit të tij në Shkodër, kryeministri Rama ndaloi për një vizitë në fasonerinë e familjes Shtjefni. Pronari i saj u ankua për mungesën e fuqisë punëtore të kualifikuar. Ai tha se do të marrë në Bangladesh 300 punëtorë kundrejt një page mujore 400 dollarë, teksa do t’u mbulojë dhe strehimin. Kryeministri Rama nga ana e tij tha se qeveria ka lehtësuar procedurat për marrjen e punëtorëve të huaj, duke e cilësuar një iniciativë pozitive.

Pronari: Unë po plasi tu kërku punëtorë në Tiranë dhe Berat, a doni punë dhe nuk vjen askush. Në televizione të gjithë thonë nuk ka punë, ne kemi aq shumë punë sa nuk kemi ku ta çojmë. Para disa ditësh ne kthyem një përfaqësues të “Zara”-s vetëm për mungesë punëtorësh. Paga nuk është 30 mijë lekë, por 40 mijë lekë, sa do ta bëni ju vitin tjetër.

Rama: Unë e di që kjo është bisedë e rrezikshme për ne se na hidhen në fyt dhe pastaj kur u tregojmë këto thonë se kjo nuk është punë, është skllavëri, është poshtërsi. Më vjen shumë keq për ata që nuk kuptojnë por nuk kemi çfarë t’u bëjmë. Ne e kemi kaluar ligjin e ri për të huajt që është shumë i thjeshtë, nuk ka fare më ato procedurat e tmerrshme. 7 ditë është procedura për të marrë punëtorë të huaj dhe po të them me këtë pagë që ke ti e ke të garantuar, kanë filluar të marrin edhe të tjerët,  punëtorët e huaj nga Bangladeshi, nga Pakistani, India.

Pronari: I kam porositur 300 në Bangladesh, 400 dollarë paga. E kanë të përfshirë edhe fjetjen.

Rama: I ke pronto, nuk dinë as shqip të merren me thashetheme.

Pronari: Do të bëj një kat apostafat për ta.

Rama: Kur të fillojnë të mësojnë shqip fillo dhe ndërroji se fillojnë thashethemet, u hyn krimbi, jo politika, jo demokracia, jo liria.

Pronari: E kishim mbyll për të ardhur më herët po na ra pandemia. Po tani do të vazhdojmë ti marrim. 400 dollarë duan ata.

Rama: Janë punë, punë dhe nuk ka llafe.

Ky bashkëbisedim është publikuar në televizionin e qeverisë, për të mbetur një dëshmi se vendin drejton një qeveria pa vizion.

Rama më pas u mundua ta “sqarojë” deklaratën dhe sulmoi edhe ish-drejtuesin politik që e komentoi deklaratën e tij për bangladeshasit, duke u shprehur se: “Pa rikonceptimin e strukturës ekonomike dhe modelit zhvillimor nuk do të mund të frenojmë braktisjen e vendit”.

Por Rama ia ktheu një ditë më pas: “Ku kupton Ditmir Bushati nga struktura e ekonomisë shqiptare? Ai është brenda nesh, por nuk do të thotë që kupton”.

Sot, dy vite më pas, i vetmi që nuk kupton fare nga ekonomia reale del Edi Rama, të cilit bangladeshasit e lakmuar i erdhën në Shqipëri sa për ta përdorur vendin si transit drejt vendeve të BE-së.

Sektori fason numëron një mungesë prej 25 mijë punëtorësh. Për shkak të kërkesës së lartë të fuqisë punëtore nga largimi i vendasve në emigracion sektori ishte ndër të parët që punësuan punonjës nga Bangladeshi, por ata na “lanë pendët” për të emigruar drejt Europës. Largimi i punonjësve nga Bangladeshi është ngritur si shqetësim nga fabrikat e përpunimit të drurit dhe industrisë përpunuese ushqimore. Tashmë mungesa e fuqisë punëtore është thelluar edhe në sektorin e bareve dhe restoranteve, ndërsa shoqata e Bareve dhe e Restoranteve deklaroi mungesën e 15 mijë punëtorëve, por edhe në transport dhe përpunimin e drurit.

Dëmi që i është bërë vendit nga politika pa vizion për punësimin, pagat i ka dhënë shenjat e veta të rënda me kohë dhe do të ndjehet edhe më shumë sapo të nisë sezoni veror e më tej. Do të jetë një gjendje aq e mjerë për krahë pune, sa s’do ketë bangladeshas në botë që t’i bëjë derman kryeministrit që e mendoi se e gjeti zgjidhjen te përzënia e shqiptarëve dhe zëvendësimi i tyre me aziatikë.