Gwyneth Paltrow reagon pas akuzave për promovimin e kequshqyerjes

AXELLE/BAUER-GRIFFIN

Gwyneth Paltrow tregoi se çfarë hante në një ditë dhe njerëzit reaguan ashpër ndaj dietës së saj që konsistonte me: kafe, lëng kockash apo supë dhe perime. Menjëherë e akuzuan aktoren se po promovon kequshqyerjen dhe se dieta e saj ka një ndikim shumë negativ te njerëzit. Për këtë, aktorja ka reaguar, duke sqaruar njerëzit:

“Mendoj se është e rëndësishme që ta dinë të gjithë se po zhvilloja një podkast me mjekun tim. Ky është personi me të cilin kam punuar për më shumë se 2 vite, për të përballuar ca probleme kronike”.

Më pas, shtoi:

“Kam kaluar në COVID të gjatë, që është manifestuar në shumë nivele inflamacioni. Kështu, kam punuar me Dr. Cole që të përqendrohem tek ushqimet që nuk janë inflamatore. Pra, shumë perime të gatuara, të gjitha proteinat, karbohidratet e shëndetshme ndikojnë në uljen e inflamacionit. Po funksionon shumë mirë”.

Ajo theksoi se dieta e saj nuk është këshillë për askënd. “Është një bisedë transparente mes meje dhe mjekut tim. Nuk është këshillë për askënd. Është ajo çka ka funksionuar për mua, ka pasur ndikim të fuqishëm dhe poztiv. Kjo nuk është ajo çfarë ha çdo ditë dhe meqë ra fjala, ha shumë më tepër se lëng kockash dhe perime. Konsumoj vakte të plota dhe ka shumë ditë që ha çfarë dua, patate të skuqura e çfarëdo. Është e pamundur që të kuptosh shëndetin dhe dietën e dikujt në një video 30-sekondëshe”, tha ajo.
 
Pra, nuk duhet ta marrim si këshillë dietën e saj. Jo se do e bënim, por që, sa për saktësim.