“Kurrë më mbrapa, vetëm përpara”. Ky është slogani që Partia Socialiste zgjodhi për fushatën e zgjedhjeve vendore të 14 majit. Socialistët çelën dje fsuhatën dhe në mënyrë simbolike Rama, ministrat dhe kandidatët për kryebashkiakë mbollën pemë.

Socialistët vendosën të kursejnë jo vetëm paratë duke mos shpenzuar për pankarta sikurse Rama deklaroi në mbledhjen e Kryesisë së PS, por edhe ‘zërin’ duke hequr dorë nga tubime e mëdha, e duke u strukur në takime të vogla. Se sa do ta realizojë këtë Rama mbetet për t’u parë në vijim.

Por, për t’u rikthyer te slogani i PS, Rama i cili kërkon të shohë vetëm para e bën këtë me të drejtë. Ndoshta kryeministrit i lënë paksa shije të hidhur pamjet e viteve më parë, e ndaj ka zgjedhur që shikimin tani e tutje ta hedhë sa më larg, për të mos parë se ku ishte kabineti i tij dhe ku mbërriti sot.

Për shembull, Rama nuk do të donte të rikthente pas foton e famshme duke ngrënë makarona e cila u bë virale, e që nuk jep aspak imazhin e kryeministrit të një vendi.

As Elisa Spiropali nuk do të donte të shihte pas se sa ndryshime drastike ka pësuar. Ministrja e Shtetit për Marrëdhëniet me Parlamentin e ka të qartë foton më poshtë, e cila dukshëm tregon se sa e ka ndryshuar imazhin e saj “Rilindja”.

Në këtë foto, Belinda Balluku ishte në kohën kur inspektonte rrugët, një pjesë e të cilave edhe sot (edhe pse i kanë kushtuar qeverisë miliona euro) janë të papërfunduara. Zv-kryeministrja humbi ndjeshëm peshë dhe u shfaq krejt papritur elegante dhe në formë. Ndaj slogani i “të vetëve” do t’i shkonte për shtat, sepse edhe Balluku do të zgjidhte të shihte vetëm përpara, kurrë mbrapa.

Darka e famshme e socialistëve te Nusreti bëri namin. Ndonëse qeveria nuk e përfill si ndonjë skandal, ajo darkë luksoze do të mbetet një “njollë” për PS-në, e cila harroi varfërinë dhe krizën që kishte kapluar vendin dhe shpenzoi një faturë “të kripur” nga taksat e qytetarëve për t’i bërë qejfin vetes.

As për lali Erin nuk mbeten pas ndryshimet. Veliaj, ëndrra është dhe do të mbetet mbjellja e pemëve, do të preferonte ta votonte sloganin “Vetëm përpara, kurrë mbrapa”, vetëm për të mos e parë ndryshimin që “Rilindja” i solli, nga një ish-MJAFT-ist në një kandidat “të lindur me këmishë”.

Megjithatë, slogani që Rama i servir qytetarëve si një ideal për ta shtyrë vendin drejt zhvillimit, nuk i fshin njollat që ka lënë pas Rilindja.