Festivali i filmit në Cannes pritet të jetë një ekstravagancë e vërtetë kinematografike këtë vit, ku do të shihet rikthimi i shumëpritur i Wes Andreson në ekranin e madh.

Por, Cannes 2023, do të jetë i veçantë edhe për faktin se për herë të parë në histori, një rekord prej gjashtë regjisoresh gra, do të jenë në garë për Palmën e artë.

Ndërsa, në botën më të gjerë hollivudiane, një pritje e madhe ka qenë ajo e serialit “The Idol”, i cili sheh si ideator dhe protagonist kryesor artistin kanadez Abeal Tesfaye, i njohur në art si The Weeknd dhe aktoren Lily Rose Depp.

Pikërisht në Cannes, pa të drejtë çmimi, do ta ketë premierën edhe ky serial, për t’u lëshuar më pas në transmetim nga gjigandi mediatik i spektaklit, HBO.

“Asteroid City”, i Wes Anderson, nuk mendohej se do të shfaqej në Cannes, me datën zyrtare të premierës më 16 qershor 2023.

Por, me një kast të jashtëzakonshëm, të përbërë nga yje veterane si Tom Hanks, Edward Norton dhe me sharmin e aktoreve Margot Robbie dhe Scarlett Johansson, “Asteroid City” do të gjejë vendin dhe do të jetë një rival i fuqishëm për Palmën e Artë.

Për më tepër, që Andreson sprovon veten në një zhanër të ri për të, krejtësisht “sci-fi”…vetëm në titull.

Ken Loach rikthehet po ashtu në ekranin e madh me “The Old Oak”, një surprizë sërish për Cannes 2023.

Ndërsa, me interes të jashtëzakonshëm, priten edhe premierat e “Fallen Leaves”, i regjisorit finlandez Aki Kaurimasaki, “Jeunesse”, nga kinezi Wang Bind, si edhe “La Chimera”, nga regjisorja e re italiane, Alice Rohrwacher.

Jashtë konkurrimi ndërkaq, do të jenë edhe dy gjigandë të filmave hollivudianë, ku Harris Ford do të shihet sërish si legjenda e aventurave arkeologjike, Indiana Jones, në “Indiana Jones and the Dial of Destiny” dhe regjisori legjendar Martin Scorsese, i cili ka sjellë në jetë filmin “Killers of the Flower Moon”.

Festivali do të zhvillohet prej 16 majit, deri më 27, kur do të shpallen edhe fituesit.