Susan Summerall Wiles, gruaja në hije që mund ta ndihmojë Donald Trump të fitojë

Susan Summerall Wiles, 65 vjeç, përshkruhet në shtypin amerikan si “republikania më e fuqishme që nuk njihet”.

Bashkëpunëtore në fushatën presidenciale të Ronald Reagan në vitin 1980, strategia politike me ndikim e lindur në Maryland, por e rritur në New Jersey, vajza e ish-futbollistit amerikan dhe prezantuesit të njohur të sportit Pat Summerall, Wiles kontribuoi në prapaskenë në fitoren e bujshme të Donald Trump në vitin 2016 dhe atë të Ron DeSantis në vitin 2018, në Florida.

Aktualisht ajo ka marrëdhënie të keqe me DeSantis, i cili dyshohet se u përpoq ta nxirrte nga orbita republikane, siç raportohet nga New York Times, dhe aktualisht është ndoshta zëri më autoritar dhe më me ndikim në ekipin e ish-Presidentit Donald Trump.

Trump dhe Wiles kanë shumë të përbashkëta: të dy kanë kontribuar në “krijimin” e fenomenit DeSantis dhe tani të dy, duan ta “groposin”.

Në vitin 2016, strategia republikane arriti përmes një komunikimi gjenial, të përcaktojë imazhin e manjatit si një kandidat “anti-establishment”, i aftë për të pushtuar partinë si një i huaj.

Tani Trump është larg nga të qenit favoriti në mesin e kandidatëve republikanë, ndërsa DeSantis po përballet me një periudhë krize, ndërsa pret kandidaturën e tij zyrtare, e cila, deri më sot ende nuk është konfirmuar.

“Suzie është një udhëheqëse e madhe dhe e respektuar nga një familje e mrekullueshme dhe ajo është gjithashtu një negociatore shumë e zgjuar dhe këmbëngulëse”, tha Trump në një deklaratë.

Ndryshe nga shumë prej bashkëpunëtorëve të manjatit, Wiles duket se ka pak interes për të qenë në qendër të vëmendjes. Asaj i pëlqen të fitojë, veçanërisht nëse kundërshtari kryesor, është një armik i betuar si Ron DeSantis, i cili e ka akuzuar strategen në të kaluarën, se dëshiron ta dobësojë atë dhe se është e padrejtë.

“Ata që e njohin zonjën Wiles, vë në dukje Ne York Times, thonë se ajo motivohet më pak nga paratë apo fama dhe më shumë nga njohja nga prapaskenat dhe ndikimi që ajo arrin të ketë me njerëzit që kanë rëndësi“.

Në LinkedIn, Wiles e përshkruan veten si një profesioniste dhe eksperte të komunikimit, në marrëdhëniet politike dhe qeveritare me mbi 20 vjet histori të provuar në nivel kombëtar, shtetëror dhe lokal.

Unë kam aftësi të jashtëzakonshme, dua shumëllojshmërinë dhe lulëzoj nën presion. Mbi të gjitha, më pëlqen mundësia për të bërë ndryshim.

Ajo është aktualisht CEO i Super Pac që mbështet kandidaturën e ish-Presidentit Donald Trump, Save America  Madje, Donald’s Super Pac ka financuar, javët e fundit, një sërë njoftimesh që synojnë të delegjitimojnë dhe dobësojnë figurën e DeSantis, shkruan Il Giornale.

Rivaliteti midis Trump dhe DeSantis është një tregues i luftës së brendshme në funksion të zgjedhjeve të ardhshme presidenciale.

Aktualisht janë pesë kandidatë zyrtarë që konkurrojnë për zgjedhjet paraprake të Partisë Republikane ish-Presidenti Donald Trump i cili aktualisht kryeson sondazhet, dhe madje në rritje pas aktakuzës në rastin Stormy Daniel, ish-ambasadori në OKB dhe ish-guvernatori i Karolinës së Jugut, Nikki Haley, sipërmarrësi Vivek Ramaswamy, Asa Hutchinson, ish-guvernatori anti-Trumpian i Arkansas dhe Larry Elder, kandidati republikan në Kaliforni i mundur nga Gavin Neësom dhe drejtuesi i njohur i radios.

Guvernatori i Floridës, Ron DeSantis, ish-zëvendëspresidenti Mike Pence dhe senatori afrikano-amerikan Tim Scott pritet t’i shtohen konkurrencës. Nëse Trump dhe DeSantis janë në pozicione më konservatore, Nikki Haley dëshiron të përfaqësojë qendrën “e moderuar” dhe atë krahun e partisë më të afërt me neokonservatorët.