Rusia standardizon produktet hallall

Më shumë se një vit pas sanksioneve që i vendosi Perëndimi, si ndëshkim për pushtimin e Ukrainës, ekonomia ruse nuk reflekton rënie. Strategjia e Rusisë për t’i kundërshtuar sanksionet me politika të reja ekonomike, forcimin e aleancave të vjetra dhe rritjen e numrit të partnerëve ekonomikë jashtë Europës ka rezultuar e suksesshme. FMN rishikoi vlerësimin e fundit për PBB-në ruse për 2022-2023, duke e ngritur me 9.4 pikë përqindjeje në total.

Trendi rritës reflektohet edhe në listën e miliarderëve të Forbes të 2023-shit. Nga 88 në 2022, numri i miliarderëve rusë që kanë hyrë në listë arriti në 110.

Tregu i vendeve myslimane duket se është objektivi i radhës. Rregullatori rus i cilësisë së ushqimit Roskachestvo ka akredituar një agjenci për të kryer certifikimin e brendshëm të produkteve hallall.

Organizata e re, e quajtur Roskachestvo-Halal, do të fillojë certifikimin e tregut në maj dhe pritet që deri në 100 kompani të aplikojnë për etiketën hallall deri në fund të vitit.

Rusia gjithashtu planifikon të zbatojë certifikimin hallall në sektorin e shërbimeve, duke përfshirë hotelierinë, turizmin, industrinë e hotelerisë, shërbimet financiare dhe mjekësore.

Mbikëqyrësi rus veterinar Rosselhoznadzor thotë se në vitin 2022, produktet hallall në tregun rus ushqimor përbënin rreth 10%. Produktet hallall përbëjnë 35% të eksporteve globale të mishit. Arabia Saudite është tregu më i madh i shitjeve në botë, me blerje me vlerë 1.2 miliardë dollarë në vit.

Në shkurt, qeveria ruse miratoi standardet e para mbarëkombëtare të hallallit në përpjekje për të rritur eksportet e ushqimit në vendet myslimane. Eksportet ruse të këtyre produkteve arritën vlerën 180 milionë dollarë në vitin 2021 dhe patën destinacion Arabinë Saudite dhe Emiratet e Bashkuara Arabe.

Sipas RT, Objektivi rus për këtë standard të ri të eksporteve është 400 milionë dollarë deri në vitin 2024 dhe 700 milionë dollarë deri në vitin 2030.