ERGYS MËRTIRIErgys Mërtiri, sociolog

Video-skandali i Gjicit nuk është erotik. Erosi është diçka krejt tjetër dhe nuk ka të bëjë aspak me fëlliqësinë e përdorimit të pushtetit për favore seksuale.

Ky është plotësisht një akt prostitucioni, ku prostituohet shteti.

Po për mua rasti i Gjicit nuk ka asnjë rëndësi në vetvete. Përtej tij, ky është një fenomen që shpesh shfaqet hapur paturpësisht.

Madje mund të thuash se fuksionon shpesh gati-gati si një standard, apo si një mënyrë jetese kuadrosh politikanë, funksionarë, drejtorë, titullarë…

Kur zyrat e shtetit bien në duar të njerëzve banalë, sigurisht që do përdoren për gjithçka, pasi shteti në tërësi është bërë një kuplara e madhe.

Për çfarë tjetër këta njerëz i duan këto poste? Fundja, kush do t’ua hidhte qurret jashtë petkut të zyrtarit?

E gjitha ka të bëjë me një kulturë barbarie, ku njeriu me pushtet e shikon gjithçka si pronë, edhe punonjësit që ka nën varësi.

Dhe ashtu si çdo pronë, edhe zyra e shtetit bëhet objekt pazari: zyrtarët ofrojnë ofiqe për seks, zyrtareshat e reja ofrojnë seks për ofiqe.

Seksi është nga njëra anë një mënyrë e ushtrimit të pushtetit, dhe nga ana tjetër, një mundësi për karrierë. Gjithçka është kërkesë-ofertë.