Teksa guvernatori i Floridës Ron DeSantis skuqte bërxollat ​​e derrit para kamerave në Panairin Shtetëror të Iowa-s të shtunën, një avion u shfaq në qiellin blu të ndezur.

Ishte avioni privat i Donald Trump ‘Boeing 757’. Ai u rrotullua mbi terrenin e panairit dhe mijëra në turmë ngritën sytë e brohoritën për ish-presidentin republikan.

Një orë më vonë, Trump mbërriti me një autokolonë nga aeroporti aty pranë ‘Des Moines’ me një pritje të ngjashme me një yll rock-u, duke i vjedhur vëmendjen DeSantis-it dhe duke e ulur rivalin e tij më të afërt për nominimin presidencial republikan.

Ishte një moment që mishëroi gjendjen e garës së emërimit presidencial republikan në vitin 2024: Trump është shumë përpara në sondazhet kombëtare, duke eklipsuar guvernatorin e Floridës dhe pjesën tjetër të fushës, të cilët deri më tani kanë qenë duke u përpjekur ta ngushtojnë hendekun.

Panairi Shtetëror i Iowa-s është një domosdoshmëri politike për kandidatët aspirantë presidencialë në shtetin Midwestern që nis garën për nominimin e republikanëve në janar.

Por me Trump që kryeson ndaj DeSantis me 34 pikë përqindjeje mes votuesve të mundshëm republikanë në një sondazh të Reuters/Ipsos më 3 gusht, dhe me pjesën tjetër të fushës që po shuhet në shifra njëshifrore, panairi këtë vit kishte ajrin e një kurorëzimi dhe jo të një konkursi bukurie.

Pavarësisht problemeve ligjore të Trump – ai është paditur tre herë këtë vit dhe mund të paditet për herë të katërt në Georgia këtë javë – ai mban një nga epërsitë më të mëdha në zgjedhjet paraprake në historinë elektorale të SHBA-së. Asnjë kandidat në historinë moderne nuk ka pasur një epërsi kaq të madhe në një paraprake të kontestuar dhe ka humbur nominimin.

Ndërsa Trump po ecte nga tenda e vendit ku piqej mishe në lokalin ‘Steer N’ Stein’ për të mbajtur një fjalim, ai i rrethua nga mbështetësit duke brohoritur, “Të duam Trump!”

“Ai po ecën shumë, shumë keq në sondazhe. Ai me të vërtetë duhet të largohet nga gara,” tha Trump për DeSantis.

Sarah Longwell, një stratege republikane që kundërshton emërimin e Trump, ka mbajtur fokus grupe me votuesit republikanë gjatë gjithë vitit. Gjatë dy javëve të fundit që ajo mbajti, në dy javët e fundit, asnjë person as nuk e përmendi DeSantis-in.

Kur u pyet drejtpërdrejt për guvernatorin e Floridës në fokus grupet e fundit, një votues e quajti atë ‘të poshtër’. Një tjetër e hodhi poshtë atë si thjesht ‘një politikan tjetër’. Një i tretë tha se ai ishte pjesë e ‘Deep state’, një term që përdoret shpesh nga teoricienët e konspiracionit për t’iu referuar njerëzve në qeveri që ata besojnë se po punojnë në mënyrë klandestine për të manipuluar politikën kombëtare.

“DeSantis është në një spirale humbjeje,” tha Longwell.

Bryan Griffin, një zëdhënës i DeSantis, i tha Reuters se konkursi republikan ishte midis Trump dhe DeSantis, i cili ‘është i vetmi kandidat në garë që mund të mposhtë Joe Biden dhe të zbatojë axhendën që na nevojitet për të rikthyer rënien e këtij vendi dhe për të ringjallur të ardhmen e tij’.

Rivalët e tjerë

Sa i përket pjesës tjetër të fushës republikane, tha Longwell, është e vështirë të shihet se si ndonjëri prej tyre mund ta kapë Trump-in.

Ka mbetur një shteg mjaft i ngushtë për dikë që të mundë ish-presidentin, por ata duhet të prodhojnë emocione dhe të dalin të parët ose të dytët në Iowa për ta bërë atë një garë me dy personave dhe për t’i bindur njerëzit se janë më të zgjedhurit, tha ajo.

Në panairin shtetëror, ajo luftë e vështirë për të arritur Trump-in u shfaq mes nxehtësisë 32 Celsius, shishqebapëve në shkop, salçiçeve të skuqura mirë, hot-dogëve; dhe një elementi kryesor të ngjarjes: një lopë me madhësi të vërtetë e skalitur nga gjalpi.

Në një duzinë intervistash me votues, Reuters zbuloi se shumica e pëlqenin DeSantis – por jo aq sa për ta mbështetur atë ndaj Trump.

“Më pëlqen ajo që ka bërë DeSantis në Florida, por dua që Trump, një biznesmen, të drejtojë vendin, dua që Trump të marrë një mandat të dytë. Ai ishte i shkëlqyeshëm për ekonominë tonë; DeSantis mund të garojë herës tjetër”, tha George Knuckey, 67 vjeç.

E pyetur për DeSantis, Carla Wilkinson, 68 vjeç, tha: “Dreqin jo. Ai është mirë në Florida, por nuk mendoj se është material presidencial. Unë jam Trump gjatë gjithë rrugës së tij.”

 Reuters