Vivek Ramaswamy iu bashkua garës republikane për t’u bërë president i SHBA-së në fillim të këtij viti – dhe megjithëse ai qëndron pas Donald Trump – i riu ambicioz ka filluar të fitojë mbështetje në SHBA.

Investitori 38-vjeçar është kandidati më i ri republikan në histori.

Axhenda e tij fokusohet në rikthimin e ëndrrës amerikane, në një vend të “humbur” nga “racizmi”, “klimatizmi”, “covidizmi” dhe “ideologjia gjinore”.

Çfarë po planifikon ai?

Ramaswamy është një rishtar në politik. Ai mendoi të kandidonte për të qenë senator në vendlindjen e tij Ohio në vitin 2022, por u tërhoq më vonë.

Kandidaturën për President e njoftoi në shkurt në Tucker Carlson Sonte. Edhe pse ai është vetë një mbështetës i zjarrtë i Trump, pasi është shfaqur jashtë gjykatës për dy nga tre rastet e paraqitura kundër ish-presidentit deri më tani, Ramaswamy ka vendosur të prezantohet si pasardhësi i tij.

Ai thotë se është i përgatitur të shkojë më tej se sa Trump në disa çështje.

Në vend që të ndërtonte vetëm një mur përgjatë kufirit SHBA-Meksikë, ai thotë se do të vendosë ushtarë në intervale gjysmë milje përgjatë tij. Ai po ashtu ka premtuar se do të shfuqizojë FBI-në, duke rishpërndarë stafin në ato që ai beson se janë agjenci më efektive si Shërbimi i Marshallëve të SHBA-së, në mënyrë që ata të mund të fokusohen në çështje si trafikimi i fëmijëve.

Në një goditje të madhe ndaj mbështetjes perëndimore për Ukrainën, ai ka thënë se do të mbështeste një marrëveshje që lejon Rusinë të mbajë atë territor që ka.

38-vjeçari së shpejti do të publikojë një “vizion gjithëpërfshirës të politikës së jashtme” për Rusinë, Kinën, Tajvanin, Indinë dhe pjesë të tjera të Azisë.

Çfarë ka thënë ai?

Ramaswamy ka botuar dy libra. Në to ai e krahason “të majtën e zgjuar” me “skllavërinë psikologjike”, duke pretenduar se si një “fe e re laike” thotë se gjinia, raca dhe orientimi seksual përcakton se kush jemi dhe çfarë mund të arrijmë në jetë.

“Amerika është një komb sistematikisht racist. Nëse je i zi, je në thelb i pafavorizuar. Nëse je i bardhë, je në thelb i privilegjuar“, shton ai.

Ai po ashtu thotë se Amerika është bërë një vend plot me viktima ku “besimi, patriotizmi dhe puna e palodhur janë zhdukur“.

Fushata e tij, thotë ai, do të nënkuptojë “një lëvizje të re për të krijuar një ëndërr të re amerikane“.

Cila është historia e tij dhe sa është vlera e tij neto?

Ramaswamy ka lindur në Cincinnati, Ohio në 1985.

Prindërit e tij janë nga Kerala, India jugore. Babai i tij punonte si inxhinier dhe nëna e tij si psikiatre geriatrike.

Edhe pse familja është hindu, ai ndoqi shkollën katolike dhe i jep merita mësuesit të tij konservator të krishterë të pianos atje për informimin e shumë prej pikëpamjeve të tij sociale.

Pasi kishte arritur notat më të larta, ai studioi biologji në Harvard përpara se të ndiqte Fakultetin Juridik të Yale.

Ndërsa ai ishte ende duke studiuar, bashkëthemeloi StudentBusinesses.com që lidhte sipërmarrësit me burimet profesionale në internet.

Pas diplomimit në 2007 ai bashkëthemeloi një sipërmarrje të ngjashme të quajtur Campus Venture Network për të ndihmuar studentët e universitetit të fillojnë start up-et e tyre.

Gjatë viteve të para të karrierës ai punoi në fondet mbrojtëse, kryesisht në fushën e bioteknologjisë. Në vitin 2014 ai krijoi firmën e tij Roivant Sciences me qëllimin kryesor blerjen e licencave të barnave që janë braktisur nga industria farmaceutike.

Një vit më vonë ai lëshoi një nga IPO-të (oferta fillestare publike) më e madhe në historinë e sektorit kur listoi aksionet e kompanisë filial të saj, Axovant, e cila kishte blerë më parë licencën për një ilaç për Alzheimerin nga GlaxoSmithKline.

Pavarësisht se kishte fituar 315 milionë dollarë nga IPO – përfundimisht testimi i ilaçit dështoi. Kjo përvojë sipas tij ka qenë poshtëruese.

Ai u largua nga posti i shefit ekzekutiv të Roivant në vitin 2021, por duke mbajtur ende një aksion prej 7% në kompani.

Vitin e kaluar ai bashkëthemeloi një firmë të re investimi, të quajtur Strive Asset Management.

Tani ai pretendon se ka mbështetje të gjerë nga votuesit dhe donatorët e rinj. Ai thotë se rreth 40% e 700,000 mbështetësve të tij financiarë kanë ofruar donacione të vogla.

Forbes raportoi se vlera e tij neto përllogaritet në 630 milion dollarë dhe deri më tani ai ka shpenzuar 15 milion dollarë  prej tyre në fushatën e tij.