Veliaj-Berisha

Këtë njoftim e bëra se po bëhen tentativa për të zhdukur fashikuj në dosjen e SPAK-ut. Nëse aty ka prokurorë të ndershëm, ta kyçin me tre çelësa këtë dokument…

Ish-kryeministri Sali Berisha ka lëshuar akuza të forta ndaj kryebashkiakut të Tiranës Erion Veliaj sa i takon lidhjes me aferën e inceneratorëve. Në konferencën e përjavshme me gazetarët, Berisha deklaroi sot se janë zbuluar emaile dhe mesazhe që fundosin kryebashkiakun në këtë skandal.

Sipas Berishës, SPAK ka në dorë të dhëna ku tregohet se si Veliaj urdhëron pronarët e inceneratorëve të paguajnë mediat pranë tij.

“Çfarë kanë zbulimet e fundit? Zbulimet e fundit faktojnë atë që u kam deklaruar ju në mënyrë të vazhdueshme. Ndërmarrja është e Erion Veliajt. Sot, në dosjen e SPAK ekzistojnë mesazhe, emaile, në të cilat pronari i djegësit që nuk ekziston, Erion Veliaj, urdhëronte Mërtirin t’i jepte 200 mijë euro Karlo Bolinos, 100 mijë euro Fugës, 100 mijë euro Blushit. Lista vazhdon, por po ndalem me këta të tre. Pra, ishte ky pronari i parë që urdhëronte se kaq para t’i jepen këtij apo atij. Kjo është e vërteta.  Pse e thashë këtë këtu? E thashë këtë së pari në mbështetje të tezës se unë kam shtruar se sipërmarrja nuk mund të jetë kurrë Mërtiri-Zoto. Kjo nuk mund të ndodhë kurrë. Mua më kanë thënë edhe përqindjet e aksioneve të Veliajt. Por unë po rezervohem”, deklaroi Berisha.

Ai u shprehet më tej se ka tentativa që të zhduken fshikujt nga dosja e inceneratorit të Tiranës. Ai u bëri thirrje prokurorëve të ndershëm, sikundër i cilësoi ai, që të mos e lejojnë një gjë të tillë.  

“Këtë njoftim e bëra se po bëhen tentativa për të zhdukur fashikuj në dosjen e SPAK-ut. Nëse aty ka prokurorë të ndershëm, ta kyçin me tre çelësa këtë dokument në kasafortë që fakton në mënyrën më përfundimtare pronësinë e djegësit të Tiranës. Ta kyçin, madje ta shpërndajnë fotokopje”, tha ish-kryeministri.

Berisha deklaroi se sipërmarrja e djegësave ka pronar qeveritarë, kurse Zoto dhe Mërtiri janë thjesht pronarë në letra dhe mundet aksionerë në një shkallë të caktuar. Sipas tij, kurrë një zyrtar nuk mund t’i lejonte vetes firma të tilla dhe akte të tilla.

“Kurrë ndonjëherë, Zoto dhe Mërtiri nuk do mund të arrinin të ndryshonin strategjinë e trajtimit të mbetjeve urbane në bashkinë e Tiranës dhe qarkun e Tiranës, nga strategji e hartuar nga IFC për landfill dhe absolutisht kurrë djegie, siç gënjen pronari i vërtetë i djegësit. Askush nuk mund të zëvendësonte këtë strategji me djegien, përveç Erion Veliajt. Askush tjetër nuk mund të falsifikonte vendime të Këshillit Bashkiak dhe të Këshillit të Qarkut, përveç ai që kishte parashikuar që vidhte qindra milionë euro në këtë ndërmarrje. Askush nuk mund të detyronte në kundërshtim me ligjin, me tre polici, të gjithë ndërtuesit dhe qytetarët e Tiranës, që çdo dhe, çdo material interte, t’i depozitonte me detyrim në Sharrë, përkundrejt një pagese, duke vendosur një rrethin të plotë të Tiranës. Askush, përveç Erion Veliajt nuk mund të propozonte bonus 8 përqind për kompaninë e tij të djegësit të Tiranës”, tha më tej ai.

Sipas Berishës, të gjitha fijet të çojnë te Veliaj, ndërkohë që ai bredh ende i lirë. Më tej ai tha se ka dhe shifrën e aksioneve që Veliaj ka te kompanitë, por nuk preferoi ta bëjë publike.