Diplomati Flamur Gashi, gjatë një lidhje direkte me emisionin “Të Paekspozuarit” në MCN TV tha se situata në Kosovë është mjaft e tensionuar pas dështimit të sulmit terrorist të 24 shtatorit, ku mbeti i vrarë një efektiv i policisë së Kosovës. Gashi tha se ende nuk është e sigurtë që Serbia i ka tërhequr trupat e saj ushtarake nga kufiri me Kosovën.

Diplomati Gashi dënoi nga ana tjetër kërkesat e Edi Ramës për konferencën e paqes për Kosovën dhe kalimin e KFOR-it, duke i cilësuar ato qëndrimi diabolike.

“Deklarata e DASH thotë se nuk jemi ende të sigurtë që forcat serbe janë tërhequr nga kufiri me Kosovën dhe bëri thirrje që të tërhiqen sa më parë.

Sot policia e Kosovës ka tërhequr forcat e saj speciale nga Bajnska dhe ka çuar aty forcat e ndërhyrjes së shpejtë.

Opozita serbe akuzon drejtpërdrejt Aleksandër Vuçiçin për aksionin në Kosovë, ndërsa pjesa tjetër e akuzon për dështimin. Situata është mjaft e tensionuar. Janë 200 trupa të Mbretërisë së Bashkuar që do të vendosen në Kosovë. Sot eurodeputetja gjermane Viola Von Cramon ka kërkuar që të ketë trupa shtesë nga Gjermania për KFOR-in. Situata mund të precipitojë nga momenti në moment pasi Vuçiç diçka tjetër thotë dhe diçka tjetër bën.

Edhe sot KFOR-ia ka deklaruar se përgjegjës për ruajtjen e rendit në veri është Policia e Kosovës dhe duhet të marrin të gjitha masat për sigurinë në këtë pjesë.

Serbia po bën të njëjtin veprim si Rusia në Ukrainë. Vuçiçi tani të gjithë fajin ia ka kaluar Radioçiçit që e ka pranuar me dëshirë këtë rol. Të njëjtën gjë po bën në Bosnje Milorad Dodik dhe janë këta, me Putinin që kërkojnë me çdo kusht një vatër të re zjarri në Ballkan për tërheqjen e vëmendjes nga Rusia.

Nga tjetër Edi Rama me kërkesën për konferencën e paqes për Kosovën dhe kalimin e KFOR-it në veri i ka bërë me qëllim.

KFOR me Rezolutën 1244 është përgjegjës vetëm për ruajtjen e kufirit jo të rendit publik në territorin e Republikës së Kosovës dhe nëse do të ndryshohej kjo duhet të mblidhet Këshilli i Sigurimit dhe pastaj do të kishim probleme të tjera me Rusinë, Kinën dhe shtete të tjera që nuk njohin Kosovën në OKB.

Këto qëndrime diabolike të Ramës jo vetëm e ulin prestigjin e Shqipërisë, por po çojnë ujë në mullirin e Serbisë, sepse kërkesa për KFOR-in në veri është kërkesë eksplicite e Vuçiç.

Në këto momente z.Rama duhet të jetë në krah të Kosovës dhe jo të Vuçiçit, kur e gjithë bota demokratike, shtetet perëndimore, shtetet anëtare të NATO-s, SHBA-të e kanë dënuar në mënyrë te fortë dhe të prerë ndërhyrjen terroriste të forcave ushtarake që kanë ardhur nga territori i Republikës së Serbisë-deklaroi Gashi, ndër të tjera.