Ish-ministri, Ditmir Bushati në një intervistë për News 24 foli për politikën e brendshme, të jashtme, sotiatë në Kosovë dhe për arrestimin e disa zyrtarëve të lartë.

Sipas Bushatit, nuk është SPAK që duhet ta bëjë luftën kundër korrupsionit, por qeveria, duke theksuar se Spak nxjerr në pah përgjegjësitë individuale.

Arrestimet e fundit nga SPAK janë vërtetë luftë kundër korrupsionit apo janë disa statistika për tu përmbushur?

Lufta e vërtetë kundër korrupsionit është çështje kulture dhe çështje botëkuptimi. Korrupsioni duhet të luftohet në radhë të parë nga qeveria, duhet të luftohet me veprime të qarta politike dhe me marrje të përgjegjësive që shqetësojnë opinionin dhe buxhetin. SPAK nxjerr vetëm përgjegjësitë individuale. SPAK ka për detyrë ti shkojë çështjeve që kanë lidhje me përgjegjësitë individuale. PS deri tani ka treguar gatishmëri për të mos penguar punën e SPAK. është shumë e rëndësishme që anti-korrupsionin, anti-nepotizmin ne nuk mund të presim të na e luftojë SPAK edhe sikur të marrim të mirëqenë që në SPAK janë të gjithë prokurorët ëngjëj, çka nuk është rasti. Ne na duhet të kemi një qasje tjetër në raport me çështjen e sundimit të së drejtës.