Në aktivitetin “Klubi i librit: Mësojmë nga e kaluara” ku u diskutua mbi librin ditar dhe poezi të Drita Çomos është publikuar dhe një letër ku mamaja e Drita Çomos, Liri Belishova i shkruan Enver Hoxhës. Më poshtë letra e plotë. 

Cërrik 10 Mars 1977
Sekretarit të I të K.Q. të PPSH
Sh. Enver Hoxha

Më falni që po ju shqetësoj përsëri, po nuk kam marrë përgjigje për letrën që ju kam drejtuar më 5 tetor dhe nuk kam rrugë tjetër. Ju lutem të më jepni një përgjigje.
Po bëhen afër 6 muaj që kur e kanë marrë tim shoq nga burgu i Burrelit dhe nuk dimë asgjë për të. Organet e Sigurimit thonë se hetimet mund të vazhdojnë sa të jetë nevoja. Po a është e mundur, e ligjshme që një situatë e tillë, e tmerrshme të vazhdojë pa kufi?
Edhe një herë ju lutem shumë, shumë, sh. Enver Hoxha si udhëheqësit kryesor të partisë e të shtetit, si anëtarit të Presidiumit të Kuvendit Popullor, si njeri: të ndërhyni që mos ta rigjykojnë e dënojnë përsëri me burg, por le ta internojnë dhe të na lënë bashkë të kalojmë bashkë vitet që na mbeten. Ju lutem shumë mos lejoni ta varrosin të gjallë në burg, mos lejoni të na shkatërrojnë krejt jetën duke na ndarë për jetë. Sa mizore do të ishte kjo tani që ai do të kthehej pas 17 vjet dënimesh! Unë di sa rëndësi të madhe ka fjala juaj për shpëtimin tonë. Ju lutem shumë të ndërhyni për këto arsye:
1.Së pari, sepse mendoj që nuk ka baza ligjore për ta dënuar atë përsëri me burg, sepse nuk ka bërë asnjë veprim kundra partisë e shtetit.
Nëse organet kompetente duan ta izolojnë për shkak të pikëpamjeve të tij, nëse kanë dyshime etj., le të internojnë.
Përse mund ta akuzojnë atë tani pas 17 vjet burgimi? Mos për të metat në bujqësi? Por, pavarësisht ç’të meta pati ai realisht në Ministrinë e Bujqësisë këto i analizoi forumi më i lartë- plenumi i K.Q. dhe Maqua u dënua një herë nga partia e nga shteti- u përjashtua nga partia dhe u hoq si Ministër.
Dyshimet, keqkuptimet, provokacionet, shpifjet, nervozizmit, inatet etj, etj, janë të paevitueshme në të tilla raste. Po këto mund të sqarohen, të vërtetohen. Hetimet nuk japin medoemos për çdo të arrestuar materialin e nevojshëm për t’ia paraqitur gjyqit e dënuar me burg. Prokurori i Përgjithshëm ka kompetencën ligjore t’i ndërpresë këto. Nuk mund të merret njeriu në qafë krejtësisht pa baza të forta.
2.Së dyti, ju lutem shumë të ndërhyni, sepse edhe duke e internuar sigurohet izolimi i tij i plotë nga të afërmit e të gjithë njerëzit. Absolutisht asnjë dëm, asnjë rrezik nuk do ti vinte partisë e shtetit. E vërteton këtë eksperienca kaq vjeçare e internimit tim. Ahere përse merren masa ekstreme pa qenë nevoja?
Përse t’u shtohen vuajtjet njerëzve, t’u shkatërrohet jeta pa qenë e domosdoshme? Ç’do gjë ka një masë e s’thuhet kot masa është uniteti e të gjitha konditave. Asnjë përfitim nuk kanë partia e shteti nga këto. Përkundrazi.
3.Së treti, ju lutem shumë të ndërhyni, sepse na ka ndodhur një fatkeqësi e madhe. Vajza jonë, që përgatitej të jepte provimet e maturës, u godit nga një sëmundje e rëndë në mushkëri. Për këtë u shtrua në spitalin e sëmundjeve kanceroze, onkologjiku ju bënë rrezatime me kobalt. Tani e kanë shtruar përsëri në këtë spital.
Ky është dënimi ynë më i tmerrshëm. Ju lutem shumë të na lënë bashkë të kujdesemi për vajzën, ta përballojmë bashkë këtë fatkeqësi. Ju e kuptoni ç ‘tragjedi është kjo për ne.
Ju lutem shumë të merrni në konsideracion sa parashtrova dhe të keni parasysh se ai, si dhe unë, u lidhëm me komunizmin që në moshën më të njomë dhe për kaq vjet luftuam e punuam pa kursyer asnjë në radhët e partisë e në udhëheqje të saj.
Po në se mendoni të më jepni një përgjigje negative, ju lutem shumë të autorizoni një shok të udhëheqjes të më takojë. Asgjë s’do të humbisnit nga kjo sh. Enver.
Edhe një herë ju lutem shumë mos lejoni ta dënojnë përsëri me burg, mos lejoni të na e shkatërrojnë krejtësisht jetën.
Liri Belishova