Ishin pikërisht këto tre qytet të cilat u bënë “thembra e akilit” për Erdoganin.

Zgjedhjet vendore të kësaj të diele, i dhanë në drejtim të papritur situatës politike në Turqi! Mbi 61 milionë turq shprehën vullnetin e tyre nëpërmjet votës. Pasqyra e këtyre zgjedhjeve duket komplet ndryshe nga një vit më parë ku opozita e bashkuar u shkërmoq nga partia e Erdoganit.

Partia për Drejtësi dhe Zhvillim (AK Parti) e Erdoganit dhe partia kryesore opozitare, Partia Popullore Republikane (CHP), kanë pasur në një garë kokë më kokë, sa i takon votës në rang vendi. Partia opozitare, CHP kryeson zgjedhjet në të gjithë Turqinë, me mbi 37.66% të votave, e ndjekur nga ‘AK Partia’ e Erdoganit, me 36.71%. Një përmbysje e rezultatit të zgjedhjeve presidenciale, që e vendos në vështirësi presidentin Erdogan.

Kur janë numëruar gati 80 për qind e votave, Partia opozitare, ‘CHP’ kryeson zgjedhjet në të gjithë qytetet e mëdha dhe kryesor të Turqisë. Në qytete si Ankaraja, Izmiri dhe Stamboll, partia opozitare “CHP”, mbizotëron bindshëm përballë “AK” së Erdoganit dhe numri i mbetur i votave ka shumë pak gjasa që të ndryshojë rezultatin përfundimtarë.Rezulatit aktual në tre qytetet e mëdha të Turqisë

Në Stamboll kur janë numëruar mbi 84 për qind e votave, kandidati i opozitës, Ekrem Imamoğlu udhëheq me 50,6 për qind, kundrejt kandidatit të Erdogan, Murat Kurum, i cili ka marrë 40.5 për qind. Një diferencë turpëruese, prej më shumë se 10 pikësh.

Në kryeqytet, Ankara, ku janë numëruar mbi rreth 70 për qind e votave, opozita me në krye kandidatin, Mansur Yavas ka marrë 59.1 për qind, kundrejt kandidatit të mazhorancës turke, Turgut Altınok i cili ka marrë deri më tani vetëm vetëm 32.8 për qind.

Edhe në Izmir, kandidati i opozitës udhëheq bindshëm. Nga numërimi i mbi 82 për qind të votave, rezulton se kandidati opozitar, Cemil Tugay ka marrë 48,5 për qind, kundrejt kandidatit të Erdogan, Hamza Dağ , i cili ka mare vetëm 37 për qind.Me të kuqe, qytetet e fituara nga opozita!

Gjithashtu në hartë e publikuar nga Komisoni Zgjedhor turk, shihet mbizotërimi i partisë opozitare ‘CHP’. Deri më tani raportohet se opozita ka arritur të fitojë 15 qytete metropolitane, kundrejtë 11 të fituara nga partia ‘AK’ e Erdoganit!

Që në fillim u bë e qartë, se gjithë lufta e këtyre zgjedhjeve ishte bazuar te qytetet e mëdha dhe qendrat ekonomike të vendit, si Stambolli dhe kryeqyteti, Ankaraja, të cilat Erdogan i humbi në vitin 2019.

Ishin pikërisht këto tre qytet të cilat u bënë “thembra e akilit” për Erdoganin. Por rënia e Erdoganit, gjithashtu simbolizon dhe ngritjen e një tjetër lideri të së ardhmes. Bëhet fjalë për Kryebashkiakun aktual të Stambollit Ekrem Imamoglu, i cili është në rrugën e duhur për t’u rizgjedhur në krye të Stambollit. Ky i fundit arriti që të mposhte për herë të dytë Erdoganin, në një nga qytetet më të rëndësishme si politikisht ashtu dhe ekonomikisht në Turqi.

Në zgjedhjet e ardhshme presidenciale, në të cilat Erdogan me shumë gjasë mund të mos kandidojë, Ekrem Imamoglu mund të jetë figura kryesore për t’u bërë presidenti i ardhshëm i Turqisë.