Nëse nevojën për politikanë të rinj opozitarë do ta kishte përmbushur PD …

Nga Indrit Vokshi

Partitë e reja

Lulëzuan sepse degradoi PD-ja.

Në raport me to, Fevziu, Sandri, Carlo, Vjollca, Irfani, Ylli, Meksi, Rakipi etj. ata që kanë media, nuk po tregohen edhe aq censurues, ata po i nxjerrin çdo javë në ekran. Se ku i njohëm ne këto parti?

I njohëm në ekranet e këtyre, pa ekranet e këtyre, sdo kishim ku t’i njihnim.

Degradimi i PD, hyrja e saj në kurs anakronik, dekadent e tribal, delegjitimimi i tmerrshëm i lidershipit demokrat në sytë e opozitarëve shqiptarë, krijoi hapsirën e nevojshme dhe boshllikun e nevojshëm për të zënë pak vend parti të reja.

Nëse nevojën për politikanë të rinj opozitare do ta kishte përmbushur PD, siç e përmbushi në 2005 apo edhe në 2009 kur PD mori votë rinore më shumë se PS, parti të reja pa anëtarë ose me pak anëtarë, nuk do të kishin vend në tregun e shpresës, në tregun e emocioneve apo në tregun e interesave, sepse atë treg do ta kënaqte një kompani e madhe, stabile dhe e besueshme, si PD.

Media në ketë pikë është treguar racionale. Media i është përgjigjur së pari nevojës së saj për të shitur fytyra të reja, mendime të reja, qasje të reja, se nëse nuk i përgjjgjet kësaj nevoje, rrëzohet vetë.

Kjo është krejt normale e racionale. Këta harrojnë se në kapitalizëm media është edhe biznes privat.

Media do të mbijetojë vetë si biznes që shet fytyra e mendime, siç duhet të mbijetojë secili që punon për veten e familjen e vet.

Ata që e shohin median si levë të revolucionit, sikur ka detyrimin që t’i shërbejë ndonjë revolucioni imagjinar e ta sakrifikojë veten për të, sillen njëlloj si komunistët apo fashistë gjobvënës që shtetëzonin ndërmarrje ngaqë iu duheshin për nevoja partiake, ia kapnin tjetrit pronën dhe e detyronin të punojë për ta.

Pronarët e medias bëjnë pakt me politikanë të vjetër apo me debutantë të rinj me qëllim për të ruajtur influencën e grupit që përfaqësojnë, pasi sjanë fillikat vetëm. Jo këtu por në të gjithë botën.

A duhet të jetë kështu? Ka dy modele, nëse ruajmë modelin e medias private, do të jetë kështu, pasi interesat private mbrojnë veten.

Nëse zgjedhin modelin ku media kontrollohet nga shteti e partia në pushtet, atëherë i kemi dhënë pushtetit monopolin e informacionit.

Ketë model e kemi pasur e me ketë model shumë pak prej nesh do të kishim mundësi për t’i transmetuar mendimet tona për mijëra njerëz.Duke qenë kështu, s’na mbetet veç të themi se kryetarët e partive të reja, deri sot po tregohen aguridhë të papjekur dhe arrogantë foshnjorë, duke akuzuar për censurë me një ego po foshnjore, pasi media ska në fokus vetëm interesat, karrierën dhe imazhin e këtyre, jetojnë edhe njerëz të tjerë në ketë republikë, vibrojnë edhe interesa të tjera në ketë vend.

Media i ka transmetuar këta në proporcion të drejtë me peshën e tyre.Nëse media ua heq prizën, këta shkrihen. Por nuk ua ka hequr prizën. Ky është fakt.