Edi Rama dhe Albin Kurti

Kryeministri Edi Rama ka njoftuar ditën e sotme se së shpejti do të nisë maratona “Sy m’SY” që do të shtrihet në të gjithën Shqipërinë jo vetëm në rrjetet sociale, që do të shërbejë si fushatë për zgjedhjet e 11 Majit.

Pra ai sapo ka deklaruar të hapur sloganin për zgjedhjet parlamentare.

Edi Rama tha se maratona “Sy m’Sy”, është një fushatë që do të shtrihet në të gjithë Shqipërinë si pjesë e mobilizimit të Partisë Socialiste për zgjedhjet e 11 majit. Me një retorikë të njohur për entuziazmin dhe hiperbolizmin e tij politik, kryeministri deklaroi se kjo maratonë do të jetë prezente kudo, në qytete, në fshatra, në rrugë, në kafene, në maja malesh dhe në buzë të detit. Ai e shoqëroi këtë shpallje me sigurinë se kjo fushatë do të sjellë një fitore spektakolare, duke e konsideruar një betejë që do të valëvisë flamurin shqiptar në tryezën e Këshillit Europian.

Pavarësisht nga mënyra sesi Rama e paraqet këtë si një ide të re, nuk mund të shmanget krahasimi me fushatën “Cep më Cep” të Albin Kurtit në Kosovë për zgjedhjet e 9 shkurtit.

Struktura dhe mesazhi i të dyjave janë pothuajse identike, një fushatë në terren, me praninë e partisë në çdo cep të vendit, duke krijuar idenë e një mobilizimi total. Kjo ngjashmëri e ka ngritur pyetjen nëse Rama thjesht është frymëzuar nga modeli i Kurtit apo ka bërë një kopjim të hapur. Në politikë nuk është e pazakontë që strategjitë të përsëriten kur janë të suksesshme, por fakti që kjo po ndodh menjëherë pas një fushate të ngjashme në Kosovë e bën më të dukshme dhe më të vështirë për t’u justifikuar si një rastësi.

Qëllimi i Ramës me këtë fushatë është i qartë, të mobilizojë bazën socialiste, të dominojë hapësirën publike dhe të krijojë perceptimin e një pranie të fuqishme në çdo cep të Shqipërisë, tani që SPAK i ka dhënë disa goditje të forta para 11 Majit.

Pas më shumë se një dekade në pushtet, PS duhet të sigurohet që elektorati i saj mbetet i angazhuar, veçanërisht në një moment kur opozita, edhe pse e fragmentuar, përpiqet të kapitalizojë mbi pakënaqësitë e akumuluara dhe të shfrytëzojë skandalet e qeverisë. Rama, pra ky ‘mjeshtër’ në ndërtimin e narrativave të mëdha dhe në krijimin e fushatave që e vendosin atë në qendër të vëmendjes, ka hedhur në treg maratonën “Sy m’Sy” si një shembull i qartë i kësaj strategjie.

Por a mund të ketë kjo një efekt të kundërt?

Nëse perceptimi publik e sheh këtë si një kopjim të një modeli të përdorur vetëm pak javë më parë nga Kurti, kjo mund të dëmtojë imazhin e Ramës si një lider inovativ dhe ta bëjë atë të duket si dikush që ndjek modën politike të momentit. Nëse opozita arrin ta shfrytëzojë këtë për të ndërtuar një narrativë mbi mungesën e ideve të reja në PS, atëherë fushata mund të mos prodhojë rezultatin e dëshiruar.

Përsa i përket ndikimit në zgjedhjet e 11 majit, nuk ka indikacione se Rama rrezikon shumicën në Kuvend, por këto zgjedhje do të jenë një test për fuqinë e tij politike. Nëse PS humbet disa bashki kyçe ose tregon shenja lodhjeje në terren, kjo mund të sinjalizojë një erozion të mbështetjes që do të ndikojë në afatin e gjatë. 

Në fund, mbetet për t’u parë nëse kjo do të perceptohet si një lëvizje autentike e Ramës apo si një hije e fushatës së Kurtit. Nëse Rama arrin ta transformojë këtë në një histori suksesi të veçantë për Shqipërinë, atëherë ai mund ta kthejë këtë debat në favor të tij. Por nëse perceptimi publik mbetet i lidhur me idenë e një kopjimi, kjo mund të shërbejë si një pikë kritike për opozitën dhe për të gjithë ata që e shohin Ramën si një lider që më shumë ndjek sesa udhëheq.

/Pamfleti