Kjo mund të jetë arsyeja pse është kaq e vështirë të humbasësh peshë

Nëse ke humbur ndonjëherë peshë dhe pastaj ke parë me tmerr se si ajo rikthehet me kalimin e kohës, nuk je vetëm. Fenomeni i njohur si “efekti jo-jo” është një betejë që shumë njerëz e njohin, por problemi mund të mos jetë thjesht tek ushqimi apo aktiviteti fizik. Qelizat e yndyrës kanë një lloj “kujtese” të obezitetit, që i bën të sillen si të tilla edhe pasi ke humbur peshë.

Yndyra nuk harron lehtë

Tek personat që kanë qenë obezë, disa gjene në qelizat e yndyrës mbeten më aktive dhe disa të tjera më pak aktivë, krahasuar me ata që nuk kanë qenë kurrë mbipeshë. Gjenet që mbeten aktivë lidhen me formimin e indit fibroz (një lloj indi të fortë, sikur qelizat janë “plagosur”) dhe inflamacionin. Ndërkohë, gjenet që funksionojnë më pak janë ato që ndihmojnë qelizat e yndyrës të punojnë normalisht.

Çudia është se këto ndryshime molekulare vazhdojnë të qëndrojnë edhe pasi personi ka humbur peshë me ndërhyrje kirurgjikale. Pra, edhe pse pesha bie, qelizat e yndyrës ende “mendojnë” se janë në trupin e një personi obez.

Çfarë do të thotë kjo për ata që duan të mbajnë peshën ideale?

Lajmi i keq është se këto ndryshime epigjenetike mund të jenë arsyeja pse është kaq e vështirë të ruash peshën pas humbjes fillestare. Lajmi akoma më pak i mirë është se shkencëtarët nuk janë ende të sigurt nëse këto ndryshime janë të përhershme apo mund të rikthehen në normalitet. Nëse po mendon të fillosh një dietë drastike, parandalimi i shtimit të tepërt të peshës në radhë të parë është më i lehtë sesa përpjekja për ta humbur atë dhe për ta mbajtur larg.

Por ka dhe një anë pozitive: me këtë informacion, mjekët dhe ekspertët e shëndetit mund të krijojnë programe më efektive për humbjen e peshës. Në të ardhmen, madje, mund të zhvillohen ilaçe që ndihmojnë në “fshirjen” e kujtesës së yndyrës. Deri atëherë, mbetet një sfidë e hapur për ata që duan të mbajnë një peshë të shëndetshme.

Burime: Nature