Analisti Frrok Çupi, i ftuar në emisionin “Real Story”, deklaroi se për Partinë Socialiste fitorja në zgjedhjet e 11 majit nuk është në diskutim, ndërsa theksoi se vëmendja tashmë është e përqendruar te mandati i pestë qeverisës. Sipas tij, Shqipëria ndodhet në një moment shumë të favorshëm në raport me Bashkimin Evropian dhe zhvillimin ekonomik.

“Mandati i katërt praktikisht është drejt përfundimit, ndaj e gjithë pesha tashmë është te i pesti. Shqipëria ndodhet në një fazë shumë pozitive – jemi në prag të Bashkimit Evropian, turizmi po zhvillohet me ritme të mira, investitorët janë të interesuar, ndërsa reforma në drejtësi ka qenë një ndër motorët më të fortë të progresit,” tha Çupi.

Megjithatë, ai vuri në dukje se me afrimin e fundit të mandatit të katërt, disa nga këto “motorë” kanë humbur vrullin, entuziazmi është zbehur dhe reformat kanë nisur të përballen me sfida.

“Reforma në drejtësi është në rrezik, jo nga faktorë të jashtëm, por nga vetvetja. Ka raste kur drejtësia ka marrë anën e të padrejtit, dhe kjo është shumë e rrezikshme për besimin publik,” u shpreh ai.

Në vijim, Çupi përmendi edhe liderin e opozitës, Sali Berisha, duke thënë se në një sistem drejtësie funksional, ai duhej të ishte hetuar të paktën për mashtrim publik.

“Me premtimet që jep dhe retorikën që përdor, një drejtësi e paanshme do ta kishte thirrur në prokurori. Nuk po flas fare për 19 kullat,” përfundoi analisti.