CEO i Meta, Mark Zuckerberg, ka habitur publikun me rrëfimin e fundit për stilin e jetesës së tij. Në një intervistë për podcastin “This Past Weekend”, themeluesi i Facebook-ut ka treguar rutinën e tij të mëngjesit — dhe jo, nuk përfshin kafe apo scrolling në rrjete sociale.

“Zgjohem në mëngjes dhe luftoj me njerëz,” thotë Zuckerberg, duke iu referuar trajnimeve të tij të përditshme në jiu-jitsu braziliane, një disiplinë që e ka kthyer në pasionin e tij të ri.

Por ajo që bie më shumë në sy është fakti se ai nuk konsumon as kafe, as substanca të tjera stimuluese. “Nuk më pëlqen të marr kimikate në trup. Nuk jam as për kafeinë,” u shpreh ai, duke shtuar se motra e tij e ngacmon duke thënë se ai po “rawdog reality”, një shprehje që përkthen jetesën pa filtra, pa ndihmën e substancave.

Përjashtimi i vetëm? Vetëm në pushime, ndonjëherë pi një kafe për qejf, dhe kaq.

Rruga drejt suksesit të Zuckerberg duket se përfshin shumë më tepër se teknologji: një mëngjes plot me proteina, stërvitje të forta, dhe mendje të kthjellët. Në vitin 2023, ai madje ka marrë pjesë në gara të arteve marciale dhe ka përfunduar sfidën ekstreme “Murph Challenge”, duke hyrë në listën e 200 më të mirëve ndër dhjetëra mijëra konkurrentë.

Ndërkohë, në planin profesional, Zuckerberg vazhdon të shtyjë kufijtë e teknologjisë: në një konferencë të fundit me CEO-n e Microsoft, Satya Nadella, ai zbuloi se AI do të jetë përgjegjëse për deri në 50% të kodit që shkruhet në Meta deri vitin tjetër.

Pra, nëse mendonit që suksesi fillon me një filxhan kafe… Zuckerberg ka një tjetër version: një mëngjes pa filtra dhe një luftë e mirë me realitetin.