Chloe Malle do të marrë drejtimin e Vogue US, duke zëvendësuar Anna Wintour, pas 37 vitesh në krye të revistës. Wintour mbetet Global Editorial Director e Vogue dhe Chief Content Officer e Condé Nast.

Malle, 39 vjeç, vajza e aktores Candice Bergen dhe e regjisorit Louis Malle, punon në redaksi prej më shumë se 14 vitesh. Ajo ka filluar si social editor, më pas u bë drejtuese e Vogue.com dhe moderuese e podcastit të revistës, The Run Through. Tani merr titullin Head of Editorial Content dhe do të udhëheqë revistën amerikane, duke vendosur edhe për mbulimin dixhital.

Anna Wintour shpjegoi zgjedhjen e saj duke thënë se kishte besim tek Malle dhe donte të siguronte vazhdimësinë e revistës. Nga ana e saj, Malle falenderoi dhe tha se Vogue tashmë e ka formësuar atë, dhe tani ajo është e entuziazmuar për të formësuar revistën.

Karriera e Malle brenda Vogue përfshin artikuj të rëndësishëm, si martesa e Naomi Biden në Shtëpinë e Bardhë dhe intervista me Lauren Sanchez.

Në vitin 2013 ajo kishte treguar se fillimisht ishte e hezituar të punonte në modë, sepse donte të ishte shkrimtare, por pasioni për Vogue e bëri të mos rezistonte.