Radar
Ekzekutimi i Charlie Kirk, Trump fajëson “të majtën radikale”
Presidenti i SHBA-së, Donald Trump, e ka quajtur aktivistin e vrarë të krahut të djathtë, Charlie Kirk, një “martir të së vërtetës” dhe ka fajësuar “të majtën radikale” për vdekjen e tij.
“Për vite me radhë, të majtët radikalë i kanë krahasuar amerikanët e mrekullueshëm si Charlie me nazistët dhe vrasësit dhe kriminelët më të mëdhenj masivë në botë”, tha Trump.
Aktivistët nga lëvizja MAGA e Trumpit e përkujtuan gjithashtu Kirkun si një martir që vdiq për vlerat konservatore. “Charlie Kirk vdiq në vijën e frontit”, tha ideologu ultra i djathtë dhe ish-këshilltari i Trumpit, Steve Bannon në “Real America’s Voice”. “Lëvizja që nisi Charlie Kirk nuk do të mbarojë kurrë”, tha aktivisti i krahut të djathtë Jack Posobiec në një bisedë me Bannon.
Personi i arrestuar në këtë rast është liruar pas marrjes në pyetje, njoftoi drejtori i FBI-së, Kash Patel, në X. Ky është personi që Patel e kishte përmendur më parë si të dyshuar. Hetimi është duke vazhduar, shkroi ai.
Presidenti i SHBA-së, Donald Trump, ka urdhëruar që të gjithë flamujt në Shtetet e Bashkuara të ulen në gjysmështizë deri të dielën në mbrëmje në nder të “patriotit të madh amerikan” Charlie Kirk.
Atentati ndaj Charlie Kirk është kulmi i një spiraleje dhune politike në Shtetet e Bashkuara. Pak më shumë se një vit më parë, gjatë fushatës zgjedhore presidenciale amerikane, një atentat u bë ndaj Donald Trump. Në maj të këtij viti, dy punonjës të ambasadës izraelite u vranë në Uashington D.C., dhe në qershor, një politikane demokrate dhe bashkëshorti i saj u qëlluan për vdekje në shtetin amerikan të Minesotës.
Charlie Kirk tha në prill 2023 në një diskutim në panel politik mbi dhunën me armë në SHBA.
“Nuk do të jesh kurrë në gjendje të jetosh në një shoqëri ku qytetarët janë të armatosur dhe nuk ka asnjë vdekje nga armë zjarri. Kjo është absurde. Por unë besoj se ia vlen. Mendoj se ia vlen, për fat të keq, të pranosh disa vdekje nga armë zjarri çdo vit në mënyrë që të kemi Amendamentin e Dytë për të mbrojtur të drejtat tona të tjera të dhëna nga Zoti. Ky është një kompromis i arsyeshëm.”
