Vajza e shkrimtarit Ismail Kadare, Besiana Kadare ka ngritur në rrjete sociale një shqetësim mbi zhurmat në kryeqytet që sipas saj kanë arritur kulmin dhe për zgjidhje propozon një peticion qytetarësh.

“Ndotja akustike në Tiranë ka kaluar çdo kufi të pranueshëm! Nuk mjaftojnë zhurmat e pafundme nga ndërtimet, tyrrjelat, çekanët, boritë e makinave, njerëzit që flasin në telefon me zë në kupë të qiellit sikur të ishin në sallonin e tyre dhe jo në hapësirë publike. Por ajo që e bën situatën edhe më të padurueshme është muzika e keqe (nuk di ku arrijnë ta gjejnë një muzike kaq te shpifur) me cilësi tingulli fare të ulët dhe me volum marramendës, që shpërthen në çdo cep rruge, bari, kafeneje e restoranti, pa pushim, në çdo orë. Kjo ndotje akustike është një makth i vërtetë për sistemin nervor! Këtë situatë nuk e kam hasur kurrë më parë, në asnjë qytet të botës. Koston e lartë po e paguajnë me shëndetin e tyre banorët e qytetit.

Cfare mund të bëjmë për të gjetur nje zgjidhje ? Ndoshta nje peticion qytetaresh per te vene gjerat ne levizje?”, shkruan Besiana Kadare.