Ferdinand Xhaferaj, një nga demokratët  e vjetër dhe një figurë e rëndësishme për vite me radhë brenda të djathtëve, ka bërë Sali Berishën përgjegjës për humbjen e Partisë Demokratike në zgjedhjet e 11 Majit.

Xhaferaj u shpreh se kreu i kësaj force politike, nuk hyri në zgjedhjet parlamentare me qëllim fitimin e tyre, por për “axhendën e tij personale”.

Sipas tij më 11 Maj si PS po ashtu dhe PD dolën të fituara, pasi qëllimi i socialistëve ishte mandati i katërt, ndërsa i Sali Berishës “dërgimi para i axhendës së tij”.

Mbajtja “peng” e të djathtëve nga ana e Sali Berishës, sipas Xhaferajt ndihmon Partinë Socialiste për të vijuar me programin e tyre dhe për të qëndruar në pushtet.

“Jashtë raportit personal dhe bashkëpunimit 30 vite në PD, ishte fat i keq që axhenda personale e Berishës ishte kundër asaj të PD, tashmë nuk është një problem brenda PD por është bërë një problem i shoqërisë shqiptare sepse me një opozitë të dobët keqqeverisja shkon përpara”, theksoi ai për News 24.

Pjesë nga fjala e Xhaferrajt:

Të gjithë e prisnin, te dinin që ishin zgjedhje formale. Për mënyrën si u soll PD para zgjedhjeve që nuk u prezantua kurrë si alternativë fituese. Procedurat ankimore janë thjeshtë formalitet. Berisha nuk ka dhënë dorëheqjen dhe për këtë ankimon vendimin e 11 majit.

Në këto zgjedhje fituan të dy palët, Rama që ka pushtetin dhe Berisha që nuk u fut për fitore, por të çonte para axhendën personale. Ishte një lojë ku fituan të dyja palët nisur nga ajko që kishin në axhendë.

Jashtë raportit personal dhe bashkëpunimit 30 vite në PD, ishte fat i keq që axhenda personale e Berishës ishte kundër asaj të PD, tashmë nuk është një problem brenda PD por është bërë një problem i shoqërisë shqiptare sepse me një opozitë të dobët keqqeverisja shkon përpara.

Ju ikët që andej dhe erdhën në Prestige, me prestigj, pra qeveria bëhet më arrogante. Edhe elementët brenda PS që duan të jenë zë kritik kur shohin një opozitë të dobët frenohen.

Demokratizimi i PD është një problem shoqëror dhe ringritja është një domosdoshmëri e padiskutueshme.