“Shfuqizim” i pjesshëm i ligjit 7501? Batutat e Ramës në Shishtavec

Kryeministri Edi Rama, në një takim me fermerët në Shishtavec deklaroi se qeveria e tij po punon për riparimin e infrastrukturës, e dëmtuar nga projektet e lëna, sipas tij, përgjysmë nga qeveria e kaluar.

“Saliu nuk ndërtoi asnjë rrugë, preu vetëm shirita. Kompanitë morën kredi për të vijuar ndërtimet por ngecën. U krijua një zinxhir i rrezikshëm borxhi ndaj kompanive. Ne s’kemi hapur kantiere të reja, por po ndërtojmë rrugët e lëna përgjysmë. Nëse nuk do t’i kishim ato borxhe do të ndërtonim rrugë 3 herë më shumë”, tha Rama.

Në vijim të fjalës së tij, kreu i qeverisë premtoi se ekzekutivi i tij do të bëjë më shumë për buxhetet familjare, duke rritur rrogat e punonjësve në institucionet shtetërore.

“Si rezultat i reformave mund të bëjmë rritjen e rrogave. Janë 100 mln dollarë që do të dalin nga shteti drejt buxheteve familjare. Me rritjen e rrogave u japim njerëzve një frymëmarrje të thellë më shumë”.

Duke kujtuar se, qeveria e mëparshme në 8 vjet nxori vetëm 124 milionë për rrogat, Rama ka saktësuar se, për rrogën minimale në shtet do të bëhet një rritje prej 35 përqind.

“Rrogën mesatare sot e kemi më të ultën në rajon. Tek rroga mesatare do të dalim mbi Kosovën dhe Serbinë dhe do t’i afrohemi Maqedonisë”, vijoi Rama.

Problem tjetër që prek, sipas tij, sektorin bujqësor është prona, që ka marrë mbi 8 mijë jetë njerëzish në 20 vjet.

“Kemi shtuar buxhetin për bujqësinë, por duhet financuar më shumë”.

Për herë të parë, kryeministri Rama propozon një zgjidhje për problemin e pronësisë së tokave ne fshat.

Gjatë takimii me fermerë të zonës se Shishtavecit në Kukës, Rama tha se do kërkojë në parlament regjistrimin e tokave sipas kufijve të vjetër, aty nuk ka konflikte mes banorëve.

Ndërsa kërkoi mbështetjen e fermerëve edhe për një katër vjeçar tjetër.

Rama dëgjoi disa nga kërkesat e banorëve: ndërtimin e rrugës dhe subvencionim per farën e patates.

Nuk kanë munguar batutat dhe shpotitë edhe në takimin e sotëm që kryeministri Rama ka bërë me banorë të Shishtavecit në Kukës. Rama tha para banorëve se është e vërtetë që nuk është bërë aq sa duhet për Kukësin.

Duke folur për reformat që janë kryer, Rama tha se janë hedhur themelet dhe pritet që të bëhet shtëpia.

 

Biseda me banorët

Rama: U zgjata, por me dha frymëzim rruga dhe dielli. Unë me Partizanin jam, nuk kam shpresë të ketë tifozllik të madhe për mua, por Partizani do fitojë, nuk diskutohet.

Banori: Unë jam fermer, kam dy- tre pyetje, se kështu jam i kompletuar 90%.

Rama: Hajde të të përqafoj pak se qenke 90% i kompletuar, unë vetë mezi u kompletova 51%.

Banori: S’ka gjë se ke kohë.

Rama: Po mo po, ajo po.

Banori: Kemi probleme me ligjin 70501, nuk kemi konflikt me njëri-tjetrin, por me ligjin.

Rama: Nuk të premtoj, se thonë nuk mban pretimet, unë me veten bëj premtime që i mbaj dhe ato që kam bërë i mbaj një më një. Për gjatësinë që kam nuk rrej, se të shkurtrit rrejnë me kollaj, nuk e kisha me ty, flas për politikën, në jetë e kam mësuar, i gjati është shërbëtor i të shkurtrit.