Kur vjen puna te gjuha, pra kur flitet për shqipen, jam më shumë se e kujdesshme. Mund të them se shpeshherë bëhem maniake. Por kështu si kanë ardhur punët me gjuhën tonë s’është për të më vënë faj… S’ka mbetur njeri pa u bërë mjeshtër i fjalës së folur dhe të shkruar! Sa dëgjoj a lexoj çfarë  katranosin çdo ditë nëpër mediat publike (që fatkeqësisht janë pa mbarim), e ndiej menjëherë që këta përdorues të gjuhës nuk kanë pikën e respektit për të. S’kanë njohuri, s’kanë ndjeshmëri dhe ç’është më e tmerrshmja marrin përsipër ta tregojnë këtë publikisht. Dhe zinxhiri i fatkeqësisë së gjuhës zgjatet e zgjatet sepse edhe vetë ata që duhet të kontrollonin mbarëvajtjen e saj  as që marrin mundimin të shqetësohen e jo më të ndërhyjnë për të rregulluar situatën dhe pasojat që vijnë prej gjithë kësaj ushtrie të paaftësh.

Një nga faktet acaruese gjuhësore, një nga përdhunimet që i bëhen shqipes sime është zhdukja e shkronjës “rr”. Le të marrim shembullin më pikant: Spikere, moderatore, gazetare lajmesh, emisionesh, intervistash, të cilat pa pikën e turpit thonë “burat”, më rrëqethin mishin…po ç’bura, moj! Apo kështu i doni ju, apo kështu i keni?
Po i morët erzin racës mashkullore, e zhburrëruat fare, moj të uruara!
Kjo është bërë kaq shumë epidemi, saqë edhe në rangjet me të larta shtetërore dëgjon drejtues e ministra të thonë “burë” në vend të “burrë”…
Dikush mund të thotë, e po mirë, punë e madhe, se shqiptarët kështu  janë mësuar, t’i neglizhojnë gjithmonë gjërat më të rëndësishme, mjafton të mos i prekë drejtpërdrejt problemi.
Pasoja e menjëhershme, ajo që iu vjen te dera e shtëpisë, vetëm atë konsiderojnë hall.
Por mendoj se, nëse ka diçka që s’duhet toleruar kjo është gjuha e një kombi! Që është ndërgjegjja dhe nënndërgjegjja e tij. Që është thelbi i transmetimit të mendimit.
Mua për vete do të me vinte turp ta quaja, për shembull, babanë tim “një burë të mirë”… Nuk e di për ju… Dikur, kur donin të talleshin me dikë, i thoshin ti je burë me një “r”, po sot, si t’ia bëjmë që na i duan të gjithë bura dhe jo burra.
Mirë femrat e ekraneve, po kanë filluar edhe vetë meshkujt ta rruajnë rr-në. Po këta çfarë kanë? S’e mbajnë dot peshën e rr-së, apo i tallin në shtëpi gratë po të vetëquhen burra?/Konica.al