Sigurimet shoqërore, sa do të paguani për çdo kategori

Drejtoria e Tatimeve bën të ditur se ka edhe tri ditë afat për regjistrimin në Tatime për të vetëpunësuarit. Deklarimi në organin tatimor të personit fizik, të vetëpunësuar pa punëmarrës dhe pa punonjës të papaguar të familjes mbi 16 vjeç, me të cilët ai punon dhe bashkëjeton ligjërisht, pasi është regjistruar në Qendrën Kombëtare të Biznesit ose në administratën tatimore dhe është pajisur me NIPT kryhet deri të paktën 3 ditë përpara afatit të paraqitjes së deklaratës (listëpagesës). Llogaritja e detyrimit të kontributeve të sigurimeve shoqërore dhe shëndetësore bëhet me efekte nga data e regjistrimit në Qendrën Kombëtare të Biznesit ose në administratën tatimore”, – bëjnë të ditur Tatimet.

Deklarimi duhet kryer të paktën 3 ditë përpara këtij afati, të tremujorit përkatës. Afati i deklarimit të listëpagesës është data 20 e muajit pasardhës të çdo tremujori, konkretisht: 20 janar, 20 prill, 20 korrik, 20 tetor.

Drejtoria e Përgjithshme e Tatimeve bën të ditur se të vetëpunësuarit duhet të deklarohen brenda datës 17 korrik.

Pagesa e kontributeve arrin në 7150 lekë në muaj për të vetëpunësuarit në biznes. Sipas ligjit në fuqi, të vetëpunësuarit dhe personat e papaguar të familjes që ushtrojnë veprimtari ekonomike sigurohen në mënyrë të detyrueshme për barrëlindje, pensione dhe sigurim shëndetësor.

Kontributet e sigurimeve shoqërore dhe shëndetësore për vete dhe për punonjësit e papaguar të familjes, mbi 16 vjeç, që punojnë e jetojnë ligjërisht, llogariten mbi bazën e pagës mujore minimale, e cila duke filluar nga data 01.05.2017, e në vazhdim është 24 000 lekë në muaj.

Për kontributet e sigurimeve shoqërore ju paguani 23% të pagës minimale mujore prej 24 000 lekësh, e barabartë kjo me 5 520 lekë në muaj. Për kontributet e sigurimeve shëndetësore ju paguani 3,4% të dyfishit të pagës minimale mujore prej 24 000 lekësh, pra 1 632 lekë në muaj.

Kontributet e sigurimeve shoqërore dhe shëndetësore paguhen çdo tremujor, brenda datës 20 të muajit të parë, pas përfundimit të çdo tremujori kalendarik. Pra, jo më vonë se datat: 20 prill, 20 korrik, 20 tetor, 20 janar. “Nëse kontributet nuk paguhen në kohë, zbatohen penalitete. Ju mund t’i paguani kontributet e detyrueshme të sigurimeve shoqërore dhe shëndetësore në filialet e bankave të nivelit të dytë ose të Postës Shqiptare. Pas pagesës së kontributeve të sigurimeve shoqërore dhe shëndetësore, ju dhe pjesëtarët e familjes me të cilët ju punoni do të pajiseni nga Agjencia e Sigurimeve Shoqërore me librezën e kontributeve të sigurimeve shoqërore e shëndetësore”, – thuhet në njoftimin e Tatimeve.