Për të fjetur mirë, fikni celularin në orën 21:00  

Për të fjetur mirë duhet të fikësh celularin  në orën 21:00 deri në mëngjesin e ardhshëm sugjeron një studim i botuar në revistën ‘Organizational Behavior and Human Decision Processes’, njoftoi agjencia italiane e lajmeve, ANSA. Sipas këtij studimi, telefoni i hapur pas orës 21:00, prish gjumin dhe rendimentin e punës ditën e nesërme. Motivi? Drita blu e celularit, që bie në sy pas orës 21:00 ndërhyn me prodhimin e hormonit melatoninë që është shumë i rëndësishëm gjatë përgatitjes për gjumë dhe për të fjetur mirë. Puna kërkimore u realizua nga Christopher Barnes i Universitetit të Uashingtonit, i cili shprehet se përdorimi i vazhdueshëm i celularit po ndërhyn me cilësinë e gjumit.

Për të realizuar kërkimin, ekspertët morën në studim 82 profesorë dhe menaxherë si edhe 161 të punësuar. Studiuesit mblodhën informacion sesi pjesëmarrësit në studim përdornin celularin, dhe sesi kjo lidhej me cilësinë e gjumit dhe rendimentin të nesërmen në punë.

Sipas studiuesve celularët emetojnë një dritë blu që sinjalizon trupin për të mos prodhuar melatoninë, hormonin që i bën trupit tonë të kuptojë që është natë, pra koha për të fjetur.