nga Alfred Lela

Joe Biden mbush 78 vjet më 20 nëntor. Sali Berisha mbushi 76 më 15 tetor. Këto data të shpejta, jo për të theksuar një nevojë të rikthimit të Berishës, megjithëse jo pak e duan këtë, por për të thënë, sa e pavend bëhet mosha kur skena politike pushtohet me eksperimente dhe aventurierë.

Ndërkohë që Berisha ka siguruar se nuk do ketë një rikthim të tij, nuk ka dhënë as shenjë për largim. Siç është shprehur: ai është këtu për betejën, jo karrierën! Kundërshtari e ka shfrytëzuar këtë pezulli në kampin demokrat për të mbjellë diversionin dëmtues ndaj Lulzim Bashës: kryetari nuk je ti!

Nëse kohët dhe përfundimet sot i përkasin pasigurisë, e sigurt është se Sali Berisha ka ndjekës, entuziastë, besnikë, adhurues dhe audienca. Në terma politikë, ai ka elektoratin e tij. Eksperimentet për ta konceptuar dhe drejtuar PD pa hijen apo autoritetin e tij nuk është se funksionuan. ‘Republika e re’ e 2017, pa simbolet e PD, pa blunë e thellë, pa berishizmin nuk shkrepi.

Cila është zgjidhja atëherë?

Nuk e di. Berisha mund të të mos shihet si zgjidhja, por duhet kuptuar se ai është i pashmangshëm.

*Editoriali i emisionit PolitikOn në RTV ORA. E enjte 16 nëntor.