Vdekja e tre pushuesve në Gjirin e Lalëzit dhe një atentat në mes të Vlorës, janë dy ngjarje që sinjalizojnë mungesën totale të shtetit në bregdetin e vendit tonë, në prag të sezonit turistik. është historia e dhimbshme familjes Haliti, që erdhën të pushojnë nga Kosova, por që humbën jetën nga helmimi i kërpudhave, pasi kishin kërkuar ndihmë në ambulancën e Manzës. Elfete, Afrim e Ferzinaze Haliti u drejtuan për në ambulancë të enjten në mëngjes, por pas mjekimit të parë u dërguan sërish në shtëpi. Siç pranojnë vetë mjekët, ata ishin trajtuar me nga një serum me vitamina, megjithëse e kishin bërë të qartë se ishin helmuar nga kërpudhat.

Djali i familjes Haliti tha se familjarëve të tij nuk u ishte bërë asnjë analizë, por mjekët u shprehën të sigurtë se kishin respektuar pikë për pikë protokollin e parashikuar në këto raste, që ishte serumi me vitamina. Sipas të gjitha gjasave, në ambulancë mungonin pajisjet që do të kishin garantuar një mjekim më të specializuar se serumi me vitamina, ndaj dhe të sëmurët ishin dërguar në shtëpi.

Kur gjendja e tyre u përkeqësua më tej, ata u rikthyen edhe një herë në ambulancë dhe më pas u transportuan drejt spitalit të Durrësit dhe më pas në Tiranë, ku humbën jetën.

Një ngjarje tjetër e rëndë, të bën të mendosh dy herë për pushimet në Vlorë. Hesapet e vjetra janë zgjidhur sërish nga breshëritë e automatikut. Në mes të ditë, në një prej rrugëve ku duket të lëvizin qytetarë, vrasës që mezi përdorin armët kanë derdhur breshëri plumbash dhe kanë mundur të largohen, duke lënë pas të një të vdekur, në një situatë jashtë kontrollit, ku policia është inekzistente.

Atentati në Vlorë ndodh në prag të sezonit turistik, në një kohë kur qyteti bëhet gati të presë mijëra pushues nga brenda dhe jashtë vendit, dhe kur më shumë se kurrë duhet garantuar siguri dhe rend nga forcat e policisë.
Të dyja ngjarjet janë kaluar në heshtje nga autoritetet shtetërore, por janë një këmbanë alarmi për këdo që këtë vit planifikon të bëjë pushimet në bregdet