Është liruar nga qelia bosi i mafias siciliane, Giovanni Brusca, krimet e tmerrshme të të cilit përfshijnë gjyqtarin Giovanni Falcone dhe vrasjen e një fëmije me acid. I quajtur “vrasësi i njerëzve”, Brusca ka rrëfyer për rolin e tij në mbi 100 vrasje, përfshirë vrasjen e prokurorit të lartë të Antimafias në Itali, Giovanni Falconen.

Lirimi i tij pas 25 vitesh burg ka zemëruar të afërmit e viktimave të tij. Ai tani do të jetë i lirë me kusht për katër vjet.

Por kush është Giovanni Brusca?

Tashmë 64 vjeç, ai ishte një figurë kryesore brenda Cosa Nostras, grupit të Mafias Siçiliane.

Në vitin 1992, ai shpërtheu bombën që vrau hetuesin kryesor të Italisë, gjyqtarin Giovanni Falcone, në një nga çështjet më famëkeqe të vrasjeve në vend. Gruaja dhe tre truprojat e Falcones u vranë gjithashtu në sulm, pasi po udhëtonin bashkë.

Kjo vrasje ndodhi vetëm dy muaj pas vrasjes së kolegut të Falcones, Paolo Borsellinon, ngjarje që tronditi Italinë dhe që çoi në ligje të reja më të ashpra anti-Mafia.

Brusca ka rrëfyer rolin e tij në më shumë se 100 vrasje. Një nga më të tmerrshmet ishte vrasja e Giuseppe Di Matteo, djalit 11-vjeçar të një mafiozi tjetër që e kishte tradhtuar. Brusca e rrëmbeu dhe e torturoi djalin para se ta mbyste dhe t’i hidhte acid në trup. Për këtë arsye, familja as nuk mundi të varroste fëmijën.

Pas arrestimit në vitin 1996, ai bashkëpunoi me drejtësinë që t’i ulej dënimi. Ai ndihmoi hetuesit të gjurmonin gangsterët përgjegjës për disa sulme mafioze në vitet 1980 dhe 1990.

Por lirimi i Bruscës ka shkaktuar hidhërim dhe zemërim tek familjarët e disa prej viktimave të tij.

Gruaja e njërit prej truprojeve të vrarë, Tina Montinaro, tha për gazetën Repubblica:

“Shteti është kundër nesh, pas 29 vitesh ne ende nuk e dimë të vërtetën në lidhje me masakrën dhe Giovanni Bruscan, njeriun që shkatërroi familjen time. Ai tani është i lirë” .

Maria Falcone, motra e gjyqtarit, tha se ishte trishtuar nga lajmi, dhe që ligji i dha të drejtën Bruscas të linte burgun.

Disa politikanë italianë dënuan lirimin e tij gjithashtu:

“Pas 25 vitesh burg, shefi i mafias Giovanni Brusca është një njeri i lirë. Kjo nuk është ‘drejtësia’ që meritojnë italianët,” shkruante Matteo Salvini, udhëheqësi i partisë La Lega.

“Është një grusht në stomak që të lë pa frymë,” deklaroi Enrico Letta, kreu i partisë Demokratike të qendrës së majtë.

*Tiranapost.al.