Gazetari Nikoll Lesi, ai që dikur “merrte shpatën” dhe mbronte opozitën, tashmë është kthyer hapur kundër kësaj të fundit, për më tepër duke mos kursyer edhe lajkat ndaj kryeministrit Edi Rama.

Në disa shkrime të publikuara së fundi në gazetën “Koha Jonë”, Lesi ka mbajtur qëndrime mjaft të forta kundër opozitës.

Në një shkrim të datës 8 qershor, Lesi dilte kundër opozitës, dhe “ledhatonte” Ramën.

 Edhe pse opozita pretendon se zgjedhjet ja vodhi Edi Rama, në editorialin e Lesit, shkruhet se opozita i humbi zgjedhjet.

Po ashtu ai shkruante se Rama kërkon të rrijë në pushtet deri në 2030.

“25 prilli iku, ndërkohë Edi Rama do rrijë edhe katër vite prapë në pushtet. Ai synon të përçajë opozitën ose ta miklojë me minipushtet që rrijë vetë deri në vitin 2030.”-shkruante gazeta e Nikoll Lesit.

Edhe pse, Lesi shprehte zhgënjimin pse Meta nuk e dekoroi gazetën e tij në 30-vjetorin e krijimit, Lesi e “drodhi” sërish, dhe u pajtua me Ilir Metën.

Në një video-editorial të publikuar në Koha Jonë, në 9 qershor, ditën që Kuvendi do të shkarkonte Metën, për këtë të fundit, Lesi thurte lavde dhe e bënte “hero”.

Më tej, nuk janë kursyer kritikat e forta për opozitën edhe në disa shkrime të tjera, ndërsa në një shkrim të publikuar dy ditë më parë, në gazetën e Lesit, opozita sulmohej ashpër.

Mesa duket, për Nikoll Lesin, tani që “iku” Meta, nuk ka më opozitë.

Në shkrimin e publikuar ndër të tjera thuhet se opozita do rrijë edhe katër vjet të tjera pa pushtet, derisa të tretet nga pak e përditë, ndërsa shton se me këtë opozitë Rama rrezikon të rrijë ne pushtet deri në 2030.

“Ajo nuk është bashkë, siç ishte para 25 prillit dhe kur na bënin spektakle gjoja “përbashkimi” dhe “solidariteti” për të mposhtur Edi Ramën.

Kjo opozitë bënte bë e rrufe se do ta rrëzonte pushtetin mafioz të Edi Ramës me çdo kusht e çdo mënyrë, por faktet që po dalin përditë na rrënqethin pasi pikërisht kjo opozitë ditën fliste kundër oligarkëve dhe koncensionëve, ndërsa natën takonte pikërisht këta oligarkë, duke iu premtuar se koncensionet do vazhdojnë, por duan “pjesën e tyre”, siç ia jepnin Rilindjes. Por Rama ua mori zgjedhjet, prapë. Dhe rreziku mbetet se prapë e prapë do ti marrë zgjedhjet dhe do mbretërojë deri nga viti 2030.”-shkruan gazeta e Nikoll Lesit.

Më tej, në shkrim thuhet se “Ça është kjo Opozitë e përçarë, e çoroditur, pa strategji, pa motiv, pa kurajo, pa forcë përballje dhe që tërheq zvarrë popullin opozitar me iluzione të kota se gjoja “Edi Rama i ka ditët e numëruara”!?

Por, për t’i vënë “kapakun” lajkave ndaj kryeministrit Edi Rama, sot në gazetën e Nikoll Lesit, është publikuar një shkrim ku në qendër të tij është bashkëshortja e kryeministrit, Zonja Linda Rama. Shkrimi përmbyllet me fjalinë se “Linda Rama ka zgjedhur pozicionin e kujdesshëm të një bashkëshorteje, por duke mbetur në thelb intelektualja e dikurshme dhe profesore e ekonomisë.”