Kryeministri Rama zhvilloi një takim me përfaqësues të Policisë së Shtetit, ku ndër të tjera është ndalur edhe tek ndërtimet pa leje në zonat bregdetare.

Por, gjatë fjalës së tij, kreu i qeverisë, duket se ka pranuar dështimin përballë të ashtuquajturve “të fortët” e bregdetit.

Rama vetë më gojën e tij pranoi se janë çuar për ndjekje penale fshatarë që kanë ndërtuar një avlli, por janë toleruar ndërtimet kriminale të paligjshme në zonat bregdetare.

“Janë cuar në ndjekje penale fshatarë të zonave të humbura, për një avlli, për një gardh, për një mur.

Ndërkohë që janë toleruar veprimtari kriminale të ndërtimeve pa leje në zonat turistike, zonat e mbrotjura natyrore arkelologjike e kështu me radhë.”-tha Rama.

Por, kreu i qeverisë, ka tentuar “të lajë duart” nga përgjegjësia e tij, si kryeministër, duke i drejtuar gishtin punonjësve të policisë, për të cilët tha se janë përfshirë në korrupsion

Rama tha se këtë e ka nënvizuar edhe me drejtuesit vendorë të Policisë së Shtetit, edhe pse po ata drejtues i “rehabilitoi” edhe me të ashtuquajtrën “ristrukturim të Policisë së Shtetit”.

“Megjithëse e kam nënvizuar edhe me drejtuesit vendore të Policisë së Shtetit, se është e turpshme, e frikshme dhe e pagëlltitshme që strukturat e policisë në territor të shpenzojnë energji, kilometra dhe kohë për të shkuar dhe për të futur në telashe fshatarë që rregullojnë avllitë, ndërkohë që para syve të tyre, me miratimin e tyre dhe me pjesëmarrjen e tyre në korrupsion, hidhet beton në pjesët më të bukura të trupit të vendit tonë.”-u shpreh kryeministri.