Rastet e koronavirusit në SHBA javën e fundit janë rritur me 300% në krahasim me javën e “Labor Day” të vitit të kaluar (31 gusht-7 shtator 2020).

Sipas të dhënave nga Universiteti ‘John Hopkins’, në javën nga 30 gushti, deri më 6 shtator 2021, në fakt, infeksionet ishin 1.14 milionë kundrejt 287.235 me vitin e kaluar.

Shtetet e Bashkuara kanë tejkaluar 40 milionë raste të Covid-19 që nga fillimi i pandemisë, më shumë se popullsia e Kalifornisë, shteti më i populluar në vend, sipas gazetës “New York Times”.

Rreth 47% e amerikanëve nuk janë vaksinuar plotësisht, duke lejuar përhapjen më të lehtë të variantit Delta. Mënyra e vetme për t’u kthyer në normalitet dhe për të kaluar një vjeshtë paqësore, janë vaksinat.

Anthony Fauci, imunologu më i famshëm amerikan, është i bindur për këtë, por ai thotë se është i shqetësuar nga skeptikët dhe njerëzit no-vax, si dhe nga dezinformatat që shfaqen në mediat sociale.

I intervistuar nga gazeta italiane “La Stampa”, këshilltari kryesor mjekësor i presidentit Joe Biden, thotë. “Nëse ka një përqindje të lartë të njerëzve të vaksinuar, gradualisht situata do të shkojë drejt një forme të normalitetit, – thotë ai. – Nëse jemi të shpejtë, gjithçka mund të mbahet nën kontroll në vjeshtë”.

Ajo që e shqetëson konsulentin e Shtëpisë së Bardhë, janë skeptikë dhe njerëzit kundër vaksinimit: “Unë jam shumë i shqetësuar. Bëhet fjalë për infektimet dhe vdekjet e shmangshme, – thotë ai. – Ka shumë dezinformata, veçanërisht në rrjetet sociale”.

Për imunologun, doza e tretë anti-Covid është një “ide e mirë”. Në fakt, është parë që pas disa muajsh efektiviteti i vaksinave zvogëlohet. Kjo është arsyeja pse “ne presim që të fillojmë shpërndarjen e dozës së tretë në SHBA brenda shtatorit”.

Vaksina “duhet të jetë e detyrueshme” sipas Faucit. Në veçanti në disa vende: “Shkollat ??dhe universitetet dhe vendet e biznesit, duhet të kërkojnë që ata që punojnë në ato mjedise të vaksinohen”.

Çfarë do të ndodhë me virusin? “Shpresoj të zhduket, por nuk jam aq i sigurt. Mendoj se do ta mbajmë pandeminë nën kontroll”, dhe “ne mund ta zbusim atë me vaksina”, përsërit drejtori i Institutit Kombëtar të Alergjisë dhe Sëmundjeve Infektive në SHBA.